Shillong, Nohprah 22 : U MLA ka Mylliem Constituency, u Bah Hamletson Dohling mynhynnin ka sngi u la plie pyrda ïa ka 13th A S Khongphai Memorial Under 14 Football Tournament ha madan Nongpiur.
Haba ai jingkren ha kane ka sngi, u Bah Hamlet u la ïaroh ïa ka Upper Shillong Sports Social & Cultural Association (USSS&CA) kaba pynïaid ïa kane ka lympung, u la ai khublei ruh ïa ka Association kaba trei na ka bynta ban kyntiew ïa ki khynnah bad ki samla ka thaiñ khamtam ha ki jingïalehkai Sports.
U bah Hamlet u la kitbok kitrwiang ruh ïa ka USSS&CA ba kan dang ïai trei ia ki kam kiba bha bad ban sei pyrthei ïa ki sap ki phong jong ki samla ka thaiñ.
Ha ka jingïalehkai plie, ka Nongpiur SC ka la pynliem noh ka Nongkseh SC da 2-0 kol.
