Jop ka New Warriors bad ka Lawsohtun ha ka SCA Cricket League 2nd Division 2024-25

0

Shillong, Kyllalyngkot 17: Ka New warriors CC bad ka Lawsohtun ki la ïoh ban khur ïa ka jingjop ha ki jingïalehkai ka lympung Shillong Cricket League ha ka kyrdan Second Division 2024-25 ba la pynïaid da ka Shillong Cricket Association ha madan Urkaliar, Shillong.
Ha ka jingïalehkai kaba nyngkong hapdeng ka New warrior pyrshah ïa ka Jersey Kings ka la sdang ha kaba ka New warrior ka la rai ban bol nyngkong hadien ba jop ïa ka toss. Haba shimti ban tied nyngkong ka Jersey Kings ka la ïoh ba kan kamai 123 ron naki 20 over ba la mang bad khyllem 7 wiket.
Napdeng ki nongtied kiba la kamai bun ron ki long u Gopal Sunar (42 ron naki 35 bol) bad u Raj Biswa (40 ron naki 36 bol). Haba phai sha ki rangkawangbol ka liang pyrshah, u Avinash kr Roy (4 over: shah tied 19 ron) bad u Pankaj Chanda (4 over: shah tied 24 ron) ki la ïoh ban khur mar 2 wiket.
Haba jubab ïa katei ka thong ba la buh, ka la donkam tang 11.2 over ïa ka New warrior ban kynjoh 128 ron da kaba hap tang 4 wiket. Watla na ka liang ki rangkawangbol jong ka Jersey Kings, ba kynthup ïa u Raj Biswas (2 over: shah tied 16 ron: khur 2 wiket) bad u Sunil Gurung (2 over: shah tied 14 ron: khur 2 wiket) ki la lehbha ha ka bol hynrei kim shym la lah ban khanglad ïa ka liang pyrshah ban kynjoh ïa ka thong.
U Pankaj Chanda u la long u namtam da kaba kamai 57 ron naki 27 bol ban ïarap pynjop ïa ka New warriors da 6 wiket bad ban khur syndon ïa ka khusnam Player of the match, hadien ba u la seisoh ruh ha ka bol da kaba khur 2 wiket.
Ka jingïalehkai kaba bud hapdeng ka Lawsohtun bad ka Akadimia Langsning CC, la sakhi ïa ka Lawsohtun kaba la khur ïa ka jingjop da 4 wiket. Ka toss la jop da ka Akadimia Langsning bad ka la rai ban tied nyngkong, kane ka kynhun ka la lah ba kynjoh 114 ron, khyllem 9 wiket naki 20 over ba la mang.
Dei tang u Mackie Blah (37 ron naki 34 bol) u ba la kamai bun ron ïa ka kynhun ha ka tied. Katba na ka liang ki rangkawangbol u Kavin k Wanniang u la long u namtam da kaba khur 3 wiket naki 4 over bad shah tied tang 22 ron, katba u Anderw B Thabah u la khur 1 wiket naki 4 over, shah tied 11 ron.
Ka la shimpor tang 14.4 over ïa ka Lawsohtun ba kan kynjoh pura bad tam ïa ka thong ba la buh, ha kaba ka la lah ban tied 117 ron bad hap 6 wiket ban jop ïa ka jingïalehkai.
U Manchester Pathaw u la kamai 17 ron naki 15 bol, hynrei ka namtam ka long sha u Man Ummulong u ba la kamai 59 ron naki 37 bol kaba la ïarap ïa kynhun ban jop ïa ka jingïalehkai da 4 wiket, ha kaba u la khur ruh ïa ka nam ‘Player of the match’ namar ka jingtrei shitom jong u.

Leave A Reply

Your email address will not be published.