Shillong, Nailar 07: Ka jingïalehkai jong ka lympung U-20 4th Division Football League 2023 ba la pynïaid da ka Shillong Sports Association (SSA) hynne ka Lah Sngi U Blei ha madan SSA Stadium First Ground, Polo, Shillong hapdeng ki kynhun kiba na ka thup jong ka Group C, ka la kut ha kaba ka Lummawbah SC bad ka Mawpdang SC ki la ïoh ban khur ïa ka namjop.
Haba phai sha ka jingïalehkai kaba nyngkong kaba la sdang ha ka por 2 baje nohphaisngi, ki rangïalehkai jong ka Lummawbah SC ki la ïoh ban khur ïa ka namjop da 4 – 2 kol ïa ka Pynthorbah SC.
ïa kine ki saw kol na bynta ka Lummawbah SC la thep da u Kevin C Royne (27min), u Andy Khmah (59min), u Jefferson Pakyntein (61min) nangta na u Nathaniel Kharnaior (67min), katba ïa ki ar kol jong ka Pynthorbah SC la thep da u Juviar Kharkongor (41 min) bad u Manbha Pohshna (45min).
Haba phai pat sha ka jingïakhun kaba ar kaba la sdang ha ka por 4 baje jan miet, ka hapdeng ka Mawklot SC pyrshah ïa ka Mawpdang SC, ka la jam sha kaba kut ha kaba ka Mawpdang ka la khur ïa ka namjop da 2-4 kol.
ïa ka namtam ha kane ka jingïakhun la khur da u Garrywell Syiem jong ka Mawpdang SC u ba la khyrwit haduh lai kol (25, 41 & 48 min), bad ka shi kol na u Patsha Syiem (30min). Ki ar kol na ka bynta ka Mawklot SC ki la wan lyngba u Iaiskhem Nongdhar (43min) nangta u Pyntyllilang Dkhar (53min).
Ka jingïalehkai mynta ka sngi (Sngi Hat Majai) kan long na ka thup jong ka Group-D, ka Mawkriah West SC ka ban aireng pyrshah ïa ka Risa Colony SC ha ka por 2 baje nohphaisngi, bud sa ka jingïalehkai hapdeng ka Pommura SC pyrshah ïa ka Mawnianglah Youth SC ha ka por 4 baje jan miet, ha SSA Ground, Polo.
