Jemkhnap ka 7 Wasa haka Lajong ha ka sngi sdang ïa ka MSL 2024 ha Wahiajer

Wahiajer, Risaw 27: Da ki hajar ngut ki riew ieid phutbol kiba thrang ban sakhi ïa ka jingïakhun hapdeng ka Shillong Lajong bad ka 7 Wasa United ki la wan tuid sha madan ïalehkai Wahiajer Multi Sports Complex Stadium ha ka sngi Saitjaiñ (26 tarik Risaw), ha kaba ka Lajong ka la sdang ïa ka jingïaid lynti da ka namjop ba i shongkun, kata ban jop haduh 9-0 kol ha ka sngi plie pyrda ïa ka 4th Meghalaya State League 2024.
Ka namtam ha kane ka jingïakhun ka leit sha u Deibormame Tongper u ba la khyrwit da ka hat trck (36’, 45’+2, 56’), nangta u Mebannangkiew Thabah u la pynkhih ar kol (48’, 50’), katba u – Yohaan Benjamin (16’), Iohborlang L Lyngkhoi (18’P), Babysunday Marngar (90’+2) bad u Emanbha Marbaniang (90’+4) baroh ki la ïoh ban thep mar kawei.
Baroh arliang ki dei ki lahduh barim jong ka MSL, ha kaba ka 7 Wasa ka la rah ïa ka namlahduh ba nyngkong ha u Kyllalyngkot 2018 bad ka Lajong ka la bujli kum ka lahduh ha u Nohprah snem 2019, hynrei kine ki arliang mamla kim pat ju ïakynduh mynno mynno ruh ha kane ka lympung tad haduh ka sngi Saitjaiñ ha ka jingïakhun sdang jong ka 4th MSL.
ïa kane ka lympung la pynlong da ka Meghalaya Football Association ryngkat ka jingkyrshan ba pura na ka tnat Sports jong ka Sorkar Jylla Meghalaya.
Mynta ka kynti ka Wahiajer ka la long kawei na ki jaka kaba la ïohpdiang ban pynlong ïa ki jingïalehkai jong ka MSL 2024 na bynta ki kynhun ka Group-E, bad ka Local Organising Committee jong ka thaiñ ryngkat ka jingïatreilang bad ka Dorbar Shnong, ki la lah ban pynlong ïa ka sngi plie pyrda kaba seisoh bad kaba i shongkun.
Ha kane ka sngi la wan Kongsan da u Symbud Myntri Rangbah ka jylla – u Bah Sniawbhalang Dhar, uba la ai khublei ïa ka MFA kaba la wanrah ïa ka jingïakhun sdang ïa ka MSL 2024 ha Wahiajer bad ïa ka jingtrei shitom jong ka synjuk ban kyntiew bad pynroi ïa ka phutbol ha kylleng ka jylla. Kiwei pat kiba la don ryngkat ha kane ka sngi ki long u Bah Hamletson Dohling-President ka MFA, Bah John F Kharshiing-Working President ka MSOA, ki dkhot ka MFA lem bad kiwei kiwei de ki riew rangbah jong katei ka thaiñ.
“Ka Meghalaya mynta ka la don shibun ki madan artificial turf, ki jaka ïalehkai katkum kane ka juk bad kiwei dei ki jingtei ha kaba ïadei bad ka Sports,” la ong u Bah Sniawbhalang Dhar. “Ka phutbol kam dei tang ka jinglehkai na ka bynta ban pynneh pynsah ïa ka met hynrei ka dei ka lad ban ïoh kam kaba heh mynta,” u la bynrap.
Haba ai jingkren sdang u Bah Hamletson Dohling u la ai khublei ïa ka Sorkar Jylla kaba la bteng ban ai ka jingkyrshan, ïa kaba khlem ma ka, kane ka lympung kan nym lah ban long.
“Ka MFA ka trei shitom ban kyntiew ïa ka phutbol ha baroh kawei ka jylla na bynta ka jingmyntoi jong ki samla,” u la ong haba kren shaphang ka Meghalaya Youth League kaba thymmai bad ka jingpynrung shuh shuh ïa ki synjuk ïalehkai district (District Sports Associations).
“Ngi kwah ïa ka Meghalaya ban sei bun ki player ba pawnam bad ban kylla long ka jylla kaba khlaiñbor ha ka phutbol,” u la bynrap.
Haba phai sha ka jingïakhun, ka Lajong ka la pynshaïong ngaiñ ïa ka liang pyrshah da ka rukom ïalehkai kaba stet kaba la long ka jingma man ka por ba ka Wasapyrshang ban pynpra ïa ka kut ba skhem (defence) jong ka 7 Wasa, ha kaba ka la ïoh ban lamkhmat haduh 4 kol tang ha ka kylla step.
Lah ban kdew ba kane ka dei ka jingïalehkai hala ïing ïa ka 7 Wasa, ha kaba bun ki paidbah ki la wan ban kyrshan bad ai mynsiem ïa ka kynhun hynrei ki la sah ha ka lyngngoh namar ka jingtbit ki rangïalehkai ka Lajong, ha kaba ki la bteng ban pynkhih sa 5 kol ha ka kylla miet bad jop da 9 kol.
Ha kane ka Lah Sngi U Blei yn sakhi ïa san tylli ki Group ki ban sdang ïa ki jingïakhun ba nyngkong. Baroh ki jingïalehkai kan long ha ka por 2 baje nohphaisngi.
Group A (Tura): Chipakkore vs Atong Matgrik
Group B (Mawkyrwat): Mawten vs Khliehmawlieh
Group C (Tyrsad): ym don jingïalehkai
Group D (Khliehriat): Rymbai Skhenshynriah vs Rangdajied United
Group E (Wahiajer): Seinbhalang Skhentalang vs Mawtari Myrdon
Group F (Shillong): Mawlai vs Seng Samla Mawmluh