Jan 25% ki nongshong shnong ki hap hapoh ka Early Childhood Development: Sampath Kumar

Shillong, Naitung 23: Ka Directorate of Social Welfare, ka sorkar jylla, ha ka jingïatreilang bad ka Department of Sociology, Shillong College, ka la pynlong ïa ka workshop halor ka phang “Creating a Well-Functioning Care Economy” ha Shillong College ha ka sngi Palei. Ha kane ka prokram la wan ban shim bynta da ki heh sorkar, ki nongthoh, ki samla pule bad kiwei pat ki riew pawkhmat ban ïasyllok halor ka jinglong kongsan ban thaw ïa ka ïoh ka kot kaba bha na ka bynta ka jingkynthup bad ka roi ka par kaba neh.
Haba kren ha ka jingïalang, u Additional Chief Secretary ka jylla u Dr. Sampath Kumar, IAS, u la pynpaw ïa ka jingïohi jong ka jylla ban shim ïa ka jingim kaba ïajan bad ka social welfare, ka jingsumar kaba banjur bad ka jingkyrshan ha manla ki kyrdan jong ka jingim naduh ba ki dang rit haduh ba kin da rangbah.
U Dr. Kumar u la ong ba ka roi ka par ka Meghalaya ka ithuh ïa ki jingdonkam kiba pher ba donkam da ki nongshong shnong lyngba ki jingim jong ki. U la kdew ba jan 25 per cent jong ki nongshong shnong ka jylla ki hap hapoh ka Early Childhood Development (ECD) ka rta kaba 0-8 snem, kaba la pynlong ïa ka sorkar jylla ban pynlut bun bad buh ruh hakhmat.
Haba batai halor ka jinglong kongsan jong ka ïoh ka kot kaba da sumar, u la ong ba ym dei ban shu khmih tang kum ka bynta ka ban thaw ki lad ïohkam ïohjam na ka bynta kito ki nongri nongsumar hynrei kum ka jingpynlut ka ban pynmih ïa ka ïoh ka kot kaba neh bad kaba wanphai. Ka bam kaba tei met, Proper nutrition, ka jingpynshlur kaba dang sdang bad ka jingsumar kaba biang ha ki por ba dang pynheh pynsan ïa ki khynnah, ka jingkyntiew ïa ka roi ka san, ka jingpynbha ïa ka pule puthi kaba don jingmih bad kyntiew ïa ka jingmih kaba hadien habud, suki suki ka long ka synniang kaba khlaiñ ïa ka jingkiew ka ïoh ka kot.
U la ong ba ka Meghalaya ka long napdeng ki 5 tylli ki jylla ha ka ri ban pyntreikam ïa ka Early Childhood Development (ECD) pilot program, kaba khring ïa kiwei pat ki jylla kiba kwah ban tip halor kane na ka jylla.
Ha kane ka workshop ka la don ka jingïasyllok kaba don jingmut ban pynkhlaiñ ïa ka rukom sumar bad kiwei kiwei ki bynta.
Napdeng kiba la donlang ki long Commissioner and Secretary Pravin Bakshi, IAS; Director of Social Welfare, Saloni Verma, IAS; Dr. C. Joshua Thomas; nangta ki heh ophisar sorkar, ki nongtrei, ki nonghikai bad ki samla pule ka Shillong College bad kiwei kiwei.