Shillong, Naitung 12: Ka Assam Rifles ka pynlong ïa ka lympung ïalehkai phutbol jong ki kynthei kaba nyngkong na ka bynta ki kynhun jylla jong ka thaiñ shatei lammihngi. Kaba la jer kyrteng da ka Sentinels Cup.
Ha kane ka lympung la wan ïashimbynta hynñiew tylli ki kynhun ïalehkai phutbol kynthei kiba na ka jylla Meghalaya, Assam, Nagaland, Tripura, Arunachal Pradesh, Mizoram bad ka Assam Rifles.
ïa ka bynta ba nyngkong jong kane ka lympung la pynlong ha Lokra ha Assam. Ka jingïakhun Semi Final ka long hapdeng ka kynhun jong ka Assam Rifles bad ka Nagaland, nangta ka Semi Final kaba ar ka long hapdeng ki kynhun na Assam bad Arunachal Pradesh.
Ka jingïakhun ïa ka phainal ka la long hapdeng ka kynhun kaba na Assam Rifles bad Arunachal Pradesh kaba la pynïalehkai ha jaka ba pynngad bad kaba itynnat ha Laitkor Garrison – East Khasi Hills kaba dei ka jaka jong ka Assam Rifles ha nongbah Shillong.
Haba phai dien, la sdang ïa ka Sentinels Cup naduh ka 30 tarik Jylliew, 2024 ha Lokra, Assam bad la plie pyrda da u Lat badonburom jong ka jylla Assam- u Gulab Chand Kataria.
Haba phai sha ka final jong kane ka lympung Sentinel Cup, kaba la long hapdeng ka kynhun Assam Rifles bad Arunachal Pradesh, ka jingïakhun ka la jam sha kaba kut ha kaba ka Arunachal Pradesh ka la ïohrah ïa ka namlahduh hadien ka jingïalehkai kaba ïakhaid bha kaba la jam shaduh ka extra time.
ïa kane ka final la wan sakhilang da u Lt Gen P C Nair, PVSM, AVSM, YSM, Phd, DG Assam Rifles.
Ka jingthmu jong ka Assam Rifles, da kaba pynlong ïa kine ki lympung ka long ban kyntiew ïa ka sap bad ban pynlong ïa ka kum ka atiar ban pynshlur ïa ki samla ban kiar na ki kam lehnoh bad ki jingdih buaid bad ruh ban ithuh ïa ka sap kaba ki samla jylla thaiñ shatei lammihngi ki don.
Ka Assam Rifles ka don ruh ïa ka MoU bad ka Bhaichung Bhutia Football Academy ha ka Assam Rifles Public School (Sports) na bynta ki khynnah samla ba donsap jong ka thaiñ Shatei Lammihngi ryngkat ka jingthmu ban kyntiew ïa ki jingpyrshang jong ka Sorkar India ban jyntiew ïa ka Khelo India Abhiyan bad ka Fit India Movement.
