SHILLONG, Naitung 12: Ka Shillong Press Club, ka kynhun ki nongthoh khubor hynne ka Sngi Thohdieng ka la lah ban pynliem ïa ka kynhun jong ka seng Hynniewtrep Youth Council ha ka jingïalehkai paralok lane ka Friendly Match kaba la pynlong ha Madan Heh-Mawlai, Shillong.
Kane ka jingïalehkai ka long shibynta ka jingrakhe jong ka seng ïa ka jingdap shiphew snem naduh ba la seng ïa ka HYC ha u snem 2014, ha kaba ka HYC kan sa kynjoh ïa u mawmer ba 10 snem ha ka 17 tarik mynta u Naitung, 2024.
Kane ka jingialehkai ka long shi bynta ban wanrah ka jingiadei kaba jan hapdeng ka seng HYC bad ki nongthoh khubor ka jylla ha kaba la ïadon ryngkatlang ki nongkitkam, ba kynthup naduh u President ka SPC ba thymmai- u Bah Deimaia Siangshai kum u kongsan, nangta u Bah David Laitphang – President barim ka SPC , u President ka HYC Bah Roykupar Synrem bad ki wei ki wei.
Na bynta ka kynhun HYC la lamkhmat da u Bah Donbok kharlyngdoh kum u kapten, katba u Bah Paila kum u kapten ka SPC. Ha ka jingïalehkai ka kynhun ki nongthoh khubor ka la pynliem noh ïa ka HYC da 3 kol bad rah syndon ia ka jingjop .
