Ka bor mynta ka dei ha ka sorkar Jylla bad ha u Lat ban pynlong elekshon ha District Council : Deputy CEM

Shillong, Naitung 11 : U Deputy CEM ka KHADC, Bah Pynshngaiñ N Syiem u la ong ba ka jingpynlong lane ka jingpynjlan ïa ka elekshon ha District Council ka shong beit mynta ha ka sorkar jylla kumjuh ha u Lat hadien ba ka samoi pynjlan ka la kut.
Haba kren bad katto katne ngut ki nongthoh khubor, u Bah Pynshngaiñ uba dei ruh u Chairman jongka Select Committee kaban bishar bniah biang ïa ka kaiphod pynbeit thymmai ïa ki constituency ha KHADC u la ong ba kum ka Committee hi ki khmih ba shen kin ïoh ban sdang noh ïa ka kam.
“Ngi kyrmen ba lashai ka sngi (Sngi Thohdieng) kin pynbna (notify) ïa ka Select Committee bad shen hi ngin lum noh ïa ka jingïalang ba nyngkong,” la ong u Bah Pynshngaiñ.
Lah ban kdew hangne ba ki dkhot jong ka Select Committee ki kynthup naduh u Nongïalam ka Liang Pyrshah Bah Titos W Chyne, Bah Bindo M Lanong, Bah Lambor Malngiang, Bah Jambor War nalor u Secretary ka Council kum u Member Secretary. Ka jingthaw ïa ka Select Committee kadei hadien ba bun ki MDC ki la pynpaw ba ki kwah ban ïa thir sani biang shwa ïa ka kaiphod pynbeit constituency thymmai ba la aiti da ka Delimitation Committee ha ka 08tarik mynta u bnai.
Shuh shuh u la ïathuh ba kum ka Committee ki lah ban pan jingmut shuh shuh na ki para MDC lada i donkam bad kumjuh wat na ki paidbah ruh. U Deputy CEM u la ïathuh ruh ba namar ba ka samoi pynjlan ka la kut ha u Nailar kumta ki hap ban leh kloi noh ïa ka kam hynrei la katta pat ka shong ha ka jinglap jong ki para MDC kiba don ha ka Committee ha kato ka sngi ba ki lait lang.
“Kumta hadien ba ngi la ïoh ïa ka jingai jingmut jong kiba bun ngin sa lah pat ban khot ïa ka Dorbar Kyrpang ban mynjur ïa ka,” u la bynrap biang.
Haba jubab pat halor ka jingkylli haba ïadei bad ka Jaintia Hills District Council kaba dang ïaid mynta ïa ka public hearing halor ka jingpynbeit constituency thymmai, u Bah Pynshngaiñ u la ong ba ha kaba kut hi ka elekshon kan long beit ha kajuh ka samoi.
“Kumta lada jia ba ka Select Committee jongngi ka suki than kam mut ba yn hap ban hap pynjlan biang ïa ka samoi hynrei la katta ruh ka shong pat ha ka rai jong ka sorkar ne ha u Lat ka jylla bad kam shong satia ha ka bor jongngi.”
Shuh shuh u ong ba ka sorkar ka lah ban ailad biang ban pynstet ïa ka jingpynbeit ïa ka constituency thymmai bad lada slem palat pat ki lah ban pynbna ba ïa ka elekshon yn leh da ka constituency ba rim.
U ong ruh ba kum ha rilum Jaintia lada jia ba da kawei ka sur ki mynjur ki lah ban pynlong elekshon da ki constituency thymmai bad kane ka lah ban long kumjuh ha KHADC lada ka Select Committee ka lah ban pyndep kloi.
Tangba, u Deputy CEM u la ong ba ki sngewthuh ba kane ka elekshon MDC ka lah ban long kloi noh bad ba kin ym ai por than shuh.