SHILLONG, Jylliew 11: Ka lympung ïalehkai District Level Inter School Subroto Cup Football Tournament 2025 na bynta ki khynnah shynrang Under-17, ba la pynïaid da ka Ophis treikam jong u District Sports Officer ka East Khasi Hills District ka la sah satang lai tylli ki jingïakhun shuwa ban sakhi ïa ka lahduh ha kaba saw tylli ki kynhun ba dang sah mynta ki long ka Shillong Vidyalaya Sec. School, ka St.Anthony’s Hr.Sec. School, ka O.M. Roy Memorial Hr.Sec.School, bad ka Umphyrnai Presbyterian Sec. School.
Baroh saw tylli ki kynhun ki la pynthikna ïa ka jaka jong ki ha ka semi final hadien ba ki la jop ïa la ki jong ki jingïakhun Quarter Final ba la long hynne ka sngi Balang ha madan SAI, Training Centre, NEHU, Shillong.
Haba phai sha ki jingïalehkai ka Shillong Vidyalaya Sec. School ka la lah ban pynliem noh ïa ka H. Elias Memorial Hr. Sec. School lyngba ka shi kol ba la thep da u Meteishaphrang kharlor (41’).
Ka St. Anthony’s Hr. Sec. School ka la pynliem suk ïa ka Rev. T. J. Jones Presbyterian School da 6-0 kol. Kine ki kol la thep da u Iateiborlang Thawmuit (2 & 50’), Kenny George Jyrwa (16’), Paosanggun khongsai (3’), Raphael Kharsahnoh (8’) bad u Chanmiki Suting (60’).
Nangta ki san kol ba la thep da u Hamedao Nongtdu (10 & 31’), u Mebanpyndap Khongjee (13’), u Lamshai Jana (45’) bad u Marbiang Kharbhih (57’) ka la pynlong ïa ka O.M. Roy Memorial Hr.Sec.School ba kan jop suk ïa ka Tyrsad Hr. Sec. School.
Ha ka Quarter final kaba khatduh la sakhi ïa ka Umphyrnai Presbyterian Sec. School kaba la pynliem noh ïa ka Shillong College da 2-0 kol, Kine ki ar kol la thep da u Batmeiaki Kharkongor (18’) bad u Famously Kharmaawphlang (30’).
Ka semi final kan long ha kane ka sngi Palei (12 tarik Jylliew, 2025) ha ka por 10 baje mynstep ha kaba ka Shillong Vidyalaya Sec. School kan aireng pyrshah ïa ka St.Anthony’s Hr.Sec. School, nangta ha ka por 11:30 mynstep ka O.M. Roy Memorial Hr.Sec.School kana ïakhun pyrshah ïa ka Umphyrnai Presbyterian Sec. School.
