SHILLONG, Jylliew 11: Kum shi bynta ban saiñdur ha ka rukom kaba bit bad ban pynkhreh ïa ki khynnah na ka bynta ka 39th National Games ka ban long ha Meghlaya, na ka liang jong ka Meghalaya Athletics Association ka la rai ban pynlong da ka jingpyrshang jied lane ka “Selection Trial” na ka bynta ki khynnah jong ki 12 tylli ki District ka Jylla Meghalaya.
ïa kane ka Meghalaya Athletics Association ka la rai hadien ba ka la shong ïa ka jingïalang ha ka 4 tarik Jylliew, 2025.
Katkum ka kyrwoh na bynta ka East bad West Jaintia Hills ka jaka ban pynlong ïa ka jingpyrshang jied nongïalehkai kan long ha Wahiajer Stadium ha ka 28 tarik Jylliew, 2025 bad ka por kan long naduh 9 baje mynstep.
Na ka bynta ka East Khasi Hills, Eastern West Khasi Hills, Ri-Bhoi, South West Khasi Hills bad ka West Khasi Hills ka jaka kan long ha SAI, STC, Shillong ha ka 05 tarik Naitung, 2025 naduh ka por 9 baje mynstep.
Katba ïa ki san tylli ki District na Garo Hills ba kynthup ïa ka East Garo Hills, North Garo Hills, South Garo Hills, South West Garo Hills bad West Garo Hills ka jaka kan long ha TURA, hynrei ïa ka madan ban pynlong ïa ka Trial yn sa pynbna hadien. Ka tarik ba la buh ïa kine kan long ha ka 12 tarik Naitung, 2025 naduh ka por 9 baje mynstep.
Ka MAA ka la pyntip ruh ba ka por ba khatduh ban pdiang ïa ka registration (kaba hap ban apply lyngba ka online) kan long ha ka 25 tarik Jylliew bad yn nym pdiang ïa kiba phah palat ïa ka tarik ba la buh.
Ki khynnah kiba wan ïashim bynta (shynrang bad kynthei) ki dei ban kha ha lane shuwa ka 31 tarik Nohprah-2009.
Ki thup jong ki jait jingïalehkai (Event) na ka bynta kane ka Trial ki long: ka jingïakop mareh kaba 100 Mitar, 200 Mitar, 400 Mitat, 800 Mitar, 1500 Mitar, 5000 Mitar, 10000 Mitar, nangta ka Long Jump, High Jump, Triple Jump, Shot Put, Discus Throw, Javelin Throw.
La pyntip ruh ba uwei pa uwei u nongïalehkai u la lah ban shim bynta ban pyrshang tang 2 tylli ki jait jingïalehkai (Event). Na ka bynta ki jingtip ba kham bñiah phi lah ban phone ha kine ki number: Bah Pleasantly Synnah, Jt Secretary ka MAA- 7005421045, ka Kong Daisy Marwein-Jt Secretary ka MAA; 6009324164, Saljagring Marak, Vice President ka- MAA; 8974488358.
