Ishu Them Ïew Mawlong: Dei tang ka Civil Suit kaba lah ban seisoh, ong u Bah VGK Kynta

Shillong, ïaïong, 25: U Bah VG Kynta uba long u Muktiar ba pawkhmat ha ka jylla u la ong ka long kaba jwat haduh katta katta ïa ka Sorkar Jylla ban kyndang ïa ki briew kiba sah ha Them Ïewmawlong bad ha kajuh ka por u la ong lada ka Sorkar ka don shisha ïa ka mon ka lah ban pynkynriah ïa ki jaidbynriew Harijan kiba sah ha Them Ïewmawlong da kaba ujor da ka Civil Suit ha Iingbishar.
Dang shen u Secretary jong ka Harijan Panchayat Committee (HPC) u Gurjeet Singh u la ong ka komiti ka la kyntait ïa ka jingtyrwa jong ka Sorkar Jylla ban pynkynriah ïa ki briew kiba sah ha Them Ïewmawlong namarba ka Sorkar kam shym la pdiang wat tang iwei ruh na ki kyndon ba ka HPC ka la tyrwa.
Ha ka jingïakren bad ki lad pathai khubor ha ka sngi Baar, u Bah VGK Kynta u la ong, “daleilei ruh phin ym lah ban kyndang ïa kine ki briew. Ka dei tang ka Civil Suit kaba lah ban pynseisoh.”
“U Justice SR Sen uba la shongthait u la ai ïa ka hukum ba lada donkam ban weng ïa kine ki briew phi hap ban leit da ka Civil Suit. Nga ïai ban ha kane ka por, phi leh sa kumno kumno ruh ban weng ïa kine ki briew ka long kaba eh,” la ong u Bah Kynta.
“Shisien ba phi dakhol, ym tang shiphew ne ar phew snem hynrei palat shispah sanphew snem phi la dakhol kam dei shuh ka kam kaba suk. Mynta phi hap ban ithuh mano kita ki briew kiba dei hok ban sah hangto (Sweeper’s Lane) na ka liang jong ki nongtrei ka Municipal bad mano pat kiba shu sah be-aiñ. Ka dei ka kambah kamsan kaba shitom bha ban pyrkhat,” la bynrap u Bah Kynta.
Haba kylli, u la ong, “lada nga dei u Legal Adviser jong kine ki Harijan lehse ngan jin da la ong ba ki dei ban kohnguh ïa kaei kaba ka Sorkar ka la tyrwa.”
“Ha kaba khatduh hi ngi kwah ban ka don ka jingsuk bad ka jingshngaiñ haba ngi ïaid na them Ïewmawlong. Ngi kwah ruh ban pynheh ïa ka surok. Ngi kwah ruh ba ka don ka jaka pynieng kali kaba itynnat namarba kam dei ka jaka kaba rit hynrei kaba heh,” ong shuh shuh u Bah Kynta.
Haba ai nuksa ïa ki Sorkar sha kiwei ki jylla bad ïa ka Jylla Assam,u Bah Kynta u la ong, “lada phi peit ïa kiwei kiwei ki jylla bad peit ha Assam ki Forest Guard ki kyndang beit. Ka lad kaba paka tam ka dei ban ujor da ka Civil Suit ban kyndang ïa kito ki briew na kato ka jaka. Ha ka por mynshwa kato ka jaka (Sweeper’s Lane) kam dei ka Ri Raid hynrei ka dei ka Rikynti kaba mut ka dei ka khyndew shimet jong ka Kur. Lehse ha kato ka por ba kham mynshwa, haba u Syiem u ai jaka sha ka Sorkar u ju mihkhmat na ka liang jong ka kur.”
Katkum ka jingsngew jong u, lada ka long ha kano kano ka dur ban weng ïa ka jingeh ka dei beit tang da ka lynti jong ka aiñ.