Ïohpdiang u bah Sanbor ïa ka jubab ba sngewtynnad na ka ophis u Lat ka Jylla

Shillong, Naitung 10: U Bah Sanbor Shullai uba dei u myntri sorkar ha ka sngi Thohdieng, ula pyntip ba ula ioh pdiang ïa ka “jubab kaba sngewtynnad” na ka ophis u Lat ka jylla halor ka jingkyrpad ban pynsangeh ai jingmynjur ïa ka Khasi Hills Autonomous District (Trading by Non Tribals) (Amendment) Bill, 2026.
U Bah Sanbor ula leit mudui sha u Lat CH Vijayashankar haba kam ba kane ka Bill ka dei kaba iaid pyrshah ïa ka Riti Synshar ka Ri.
Haba kylli halor ka jinglong jingman jong ka jingmudui, u Bah Sanbor ula ong “Nga la ioh ïa ka jubab kaba sngewtynnad bha.Lada jia ryngkat ba ïa ka bill la phah da ka Tnad District Council Affairs (DCA), ka Sorkar Jylla sha u, un sa pynphai biang ïa kane ka kam sha ki Ophisar ba kin bishar bniah ha ryngkat bad ka Tnad Ain”.
Ha ka mudui bala aiti sha u Lat, u bah Sanbor ula pyrshah ïa ka kyndon kaba pynlong kongsan ïa ki nongaikam bar jylla ba kin shim ïa ki service licence na ka bynta ki nongbylla bar jylla.
Ula pynksan ba kane ka Bill kala jam palat ïa u pud treikam jong ka KHADC bad kala ïaid palat ïa ka bor bala pynkup hapoh ka paragraph 10 jong ka Sixth Schedule.
“Ka Khasi Hills Autonomous District (Trading by Non-Tribals) Regulation Act, 1954 ka dei kaba la pynlong aiñ ban teh kyndon ïa ka kam khaïi ki bar jylla…da kaba pyrshang ban pynïar ïa ka bor pyniaid na ki nongkhaïi shimet sha ki kompani/nongaikam shimet, ka KHADC kala tam ïa u pud shabar ka bor bala pynkup da ka riti synshar” ong u Bah Sanbor.
Ula maham ba ka jingai jingbit kan plie ïa ka jingkhang jong ka KHADC ba kan shah tynjuh ha ki mukotduma bad ka jingpynkhein ïa ka hok tynrai ki nongshongshnong.
Kane ka Bill ka dei ka jingpynkhein ïa ka Article 14, Article 19(1)(g) bad Article 21 jong ka Riti Synshar ka Ri India” ula ong.Haba kdew ïa ka Paragraph 12A jong ka Sixth Schedule, ula pynpaw ba ki Aiñ jong ka Jylla ki ieng rasong lada jia ryngkat bad ki ïatakhuh bad ki aiñ ki ADC.