Ïohpdiang ka MLCU ïa ka jingkyrshan pisa na ka British Museum ban wad bniah ïa ki dohkha tynrai ha jylla

Shillong, Nailar 08: Ka Martin Luther Christian University (MLCU) ka la ïohpdiang ïa ka jingkyrshan pisa ban wad bniah ïa ki rukom khwai doh kha tynrai na ka British Museum, London kiba don ha ka jylla. Ka thong jong kane ka long ban thoh bad ban rekord ïa ki buit bad ki tiar tynrai jong ka jylla Meghalaya.
Ka kyrteng jong ka projek ka dei “Documentation of the Production of Traditional Fishing Tools and Their Use in Freshwater Environments of Meghalaya, India”. Ki nongïalam kane ka projek ki long u Dr. Rajindra K. Puri na ka University of Kent, UK, ryngkat bad ka Dr. Larilin Kharpuri, ba dei ka Professor, MLCU bad u Dr. Pranjal Dubey, u Assistant Professor, MLCU.
Ka shnong ba la jied ha kane ka projek kan pynleit bhah khamtam ha ka imlang sahlang ki Pnar ha shnong Sohmynting, West Jaiñtia Hills District. Katba ïa ki tiar tynrai, yn wad da kiba la shna da ki tynrai kum ki tyndong, ki tlong bad ki jait siej ne ki tynrai kiba long ki jait buit bad ki tiar shna kiba ïadei bad ka mariang.
Ka jingma kaba don na kane ka long namar ka jingwan tyllep ki buit thymmai jong kane ka juk kaba mynta bad ka jingkylla ka mariang, kine ki rukom buit thymmai tynrai ki don ha ka jingma ban jah noh.
Ka jingeh bad ka phang jong ka MLCU ka long ban thmu ban pynneh pynsah ïa kine ki rukom tip tynrai na ka bynta ki pateng ban dang wan bad ban pynneh pynsah ïa ka mariang bad ka riti dustur. Kaba kham bniah ka long ban pynneh pynsah ïa ka jingshemphang tynrai jong ka jylla Meghalaya.