Ïoh jinghikai ki nongrep soh ban ïada na ka jingïap tram ki diengsoh ha ka shnong Purakhasia

Shillong, Nailar 08: Ka tnad rep soh jong ka sorkar jylla kala pynlong ïa ka jingai jinghikai ha ka shnong Purakhasia ha SWGH District hapoh ka Block Purakhasia ban hikai ïa ki nongrep ban ïada na ka jingïap tram ki dieng kwai.
Ha kane ka jingai jinghikai la wan ban ïashim bynta da ki dkhot jong ki nongkitkam shnong, ki seng treimon sngewbha, kane ka jinghikai ka long ban pynsngewthuh ïa ka khlam ïap tram ki diengkwai bad kumno ban kham pynbha ban kyntiew ïa ka kamai jong ki nongrep.
Ha kane ka jingai jinghikai ki ophisar ka tnad rep soh ki la pynshai kumno kane ka jingïap tram ki dieng kwai ka saphriang bad ka ktah ïa ka ïoh ka kot bad kiei ki lad ki lynti ban ïada, na ka liang ki ophisar ki la ai jingmut ban pyndonkam 1% Bordeaux mixture arsien shuwa ka por slap bad ynda la slap kum ka jingïada.
Ha kane ka jinghikai la batai ban pyndonkam ïa ki symbai kiba bha, sumar bha ïa ka jaka rep, kumno ban kheinñ ïa u kwai bad ban kiew ka jingïoh, kane ka dei shibynta jong ka sorkar ban pynshlur kumno ban rep katkum kane ka juk stad kaba mynta.