London, Jymmang 27 : U Erling Haaland u la shah jied kum u rangïalehkai ba kynsai tam (player of the season) jong ka samoi 2022-23, hadien ba u la pynkheiñ ïa ka record ha ka jingmih madan kaba nyngkong ïa ka Manchester City bad ïarap ba kan ïoh biang ban khur ïa ka nam lahduh jong ka Premier League.
Utei u rangïalehkai ba dang 22 snem ka karta, ula thep 36 kol ha ki 35 sien mih madan mynta ka samoi, da kaba pynkheiñ ïa ka record kaba 34 ha ka Premier League ba la buh da u Andrew Cole bad u Alan Shearer ha ki 42 sien ki jingïalehkai jong ka Premier League.
Tang u Dixie Dean, jong ka Everton ha ka samoi1927/28, u la thep kol ha baroh ki jingïalehkai (63) ha ka samoi ïalehkai ba hakhlieh tam jong ka England, ban ïa u Haaland uba thep 52.
Utei u rangïalehkai jong ka Norway udei ruh u rangïalehkai ba nyngkong ha ka Premier League ban thep hat-trick ha ki laisien ïalehkai ha ki jingïakhun ha la ïing, bad u rangïalehkai ba nyngkong jong ka Man City player ban thep ïa ka hat-trick ha ka jingïakhun Manchester derby naduh u snem 1970.
U Haaland u kylla long u rangïalehkai ba lai jong ka Man City, bad uba saw ha baroh lang, ban khur ïa katei ka nam, hadien u Kevin De Bruyne ha ka samoi 2019-20 bad 2021-22, katba u Ruben Dias u la ïoh ïa katei ka khusnam ha ka samoi 2020-21. U Vincent Kompany udei ba nyngkong ha ka samoi 2011-12.
