Shillong, Lber 30: U Teimiki Sungoh u la ïoh ïa ka nam Best Rescuer ryngkat bad ki 11 ngut kiba shah hikai napdeng ki 26 ngut kiba la ïashim bynta ha ka Search and Rescue Course ha Himalayan Mountaineering Institute ha Darjeeling dang shen.
U Bah Teimiki Sungoh uba na Shangpung ha West Jaiñtia Hills u la shim bynta ha kane ka prokram lyngba ka Meghalaya Sport Climbing & Mountaineering Association, ka synjuk kaba u bat kam kum u Assistant Secretary. Kumta un sa ïoh ïa ka kyrdan Grade A, kaba dei ka kyrdan kaba heh tam kaba la ai da ki jaka pule kiew lum (mountaineering institutes) na ka bynta ka prokram pyntbit ha ka ban wad bad pyllait im ïa ki briew ha ki jaka lum.
Kane ka prokram pyntbit la sdang ïa ka naduh ka 06 tarik haduh 28 tarik u Lber bad ka jingleit ïashim bynta jong u Bah Teimiki Sungoh la kyrshan lang da ka tnad Sports jong ka Sorkar Jylla Meghalaya.
Ki don 23 ngut ki nongïashim bynta na kylleng ka ri kiba la pyndep ïa kane ka jingshah pyntbit bad ki long kiba kloi ban jubab (shakri ïa ka kam lada donkam kyrkieh), ban pyllait im bad ban jam shakhmat wat hapdeng ki jingeh ban ïarap ïa ki bor synshar district bad kiwei ki synjuk, la ong ka MeSCMA ha ka kyrwoh kaba la pyllait sha ki lad pathai khubor ha ka sngi Saitjaiñ.
Dei tang u Bah Teimiki Sungoh uba na ka thaiñ Shatei Lammihngi (North East) bad “ka jingleh bha bad ka jingtbit jong u ka la pynhun ïa katei ka jaka pule bad la jied ïa u ban long u Guest Instructor na ka bynta ki jinghikai ki ban sa wan ha u bnai Jymmang 2025,” la bynrap shuh shuh ka MeSCMA ha ka kyrwoh.
Kiba wan shah pyntbit ki dei ban long kiba koit ba khiah ha ka met ka phad bad ha ka jingmut jingpyrkhat bad ban don ka jingmut kaba skhem. ïa kane ka prokram ai jinghikai la ju leh ha ki jaka ba kynjang ha ki lum Himalaya kiba ju kynthup ïa ka jingpyndonkam da ki ksai ban ïaid lyngba ki lynti ba long riat ha ki kliar maw, u thah, ki wahduid, ki thliew, bad kiwei kiwei, kynthup ïa ka jingpyndonkam ïa ki liengsuiñ ban pynkynriah kiba la shah ktah jur ha ka jingjia ba sngewsih bad ki ksew ba la pyndonkam ban wad ïa kiba la mynsaw.
