Khliehriat, Lber 21 :U Superintendent of Police ka East Jaiñtia Hills District, u Jagpal Singh Dhanoa, IPS lyngba u kyrwoh khubor, u pyntip ba ki bor pulit jong ka Umkiang Patrolling Post ha ka janmiet jong ka 20 tarik mynta u bnai kila ïoh ban kurup haduh 68 kilo u kynja ïa uba la song bad teh pynskhem bha da ka brown tape, la lap ïa kane hadien ka jingtalasi ïa ki kali kiba ïaid lyngba ka surok NH-6 ha Damcherra, Kuliang.
Ha kane ka jingkhynra ki pulit ki la pynieng ïa kawei ka kali Hyundai Santro kaba don ïa u registration number TR-01-AB-0422 bad ha ka jingkhynra ki la ïoh ban kurup noh ïa utei u kynja bad kem noh ïa u nongniah bad uwei pat.
Kitei ki ki arngut kiba la shah kem la tip kyrteng kum u Binoy Debbarma, 38 snem kyrta bad u Photo Kumar Debbarma, 30 snem kyrta kiba dei na ka shnong Dhariathal jong ka West Tripura distict. Na kine ki arngut la ïoh ruh ban kurup ïa ki artylli ki mobile phone bad 2 ki SIM Card.
Hadien katei ka jingioh kurup la pyndep ïa baroh ki jingdonkam bad ka register ejahar ïa ki hapoh ki kyndon jong ka NDPS Act ha ryngkat ka jingiadon lang ki sakhi kiba na ka liang ki kynhun shimet.
Ha kaba ïadei bad kane ka jingjia la rejistar case hapoh Lumshnong PS Case No.14(3)2023 u/s 20(b)(ii)(c)/29NDPS Act bad ka jingtohkit halor kane ka dang ïaid shakhmat ban lapdien sa ïa kiwei pat kiba donkti.
