Ïoh khusnam riewshlur 2 ngut ki Khynnah Khasi na Delhi
![](https://mawphor.com/wp-content/uploads/2023/01/IMG_20230120_221142.jpg)
Shillong, K’ lyngkot, 20: Arngut ki khynnah na kane ka jylla Meghalaya ki la shah jied ban ïoh pdiang ïa ka khusnam riewshlur lane ka National Bravery Award lyngba ka Indian Council For Child Welfare ha kaba kin sa shah pynkup burom ha u Myntri Rangbahduh ka ri India u Narendra Modi ha nongbah New Delhi ha ka rukom kaba shongkun.
Namar ka jingwan lynshop jong ka jingpang khlam covid-19 kumta la pynsangeh ban sam ïa kane ka khusnam ha u snem 2020-2021 bad ha u snem 2022 bad kumta mynta u snem 2023 ki don haduh 56 ngut ki khynnah na ki 17 tylli ki jylla jong ka ri India kiba la shah jied ban ïoh pdiang ïa kane ka khusnam ha kane ka kynti.
Kum ban shu pyntip hangne ba u Wanlambok Rani uba la 16 snem 3 bnai u la ïoh ban pyllait im ïa saw ngut ki briew kiba la ngam jyllop ha wah Umden katba u dang leit khwai dohkha ha ka 12 tarik, Nailar, 2020. Kane ka la jia hadien ka jingther jong u lapbah uba jur bha na ka daw ka jingpyllait um jong ka Meghalaya Energy Corporation Limited. Da kane ka jingshlur jong u wanlambok rani, u la ïoh ban pyllait im ïa kine ki saw ngut ki briew kiba don hapdeng ka rta kaba la 30 snem ka rta, 17 snem ka rta, 12 snem ka rta bad 10 snem ka rta.
Katba u heprit Forme Khongji, uba la 12 snem 9 bnai, u dei u riewshlur uba la ïoh ban pyllait im ïa kawei ka longkmie kaba la tip kyrteng kum ka kong Agnes Pohktar kaba la shah rah ha ka umsaw katba ka dang sait jain bad kiwei pat ki para kynthei ha wah Umkrem ha ka 17 tarik, u jylliew, 2020.
Katba une u heprit u dang thmu ban sum ha kane ka wah, kyndit kynsan u la ïoh sngew ïa ka jinglynñiar jong ki kynthei kiba dang saitjain ha kane ka wah bad mar kumta hi katba u dang leit jngoh u la lap pynban ïa kane ka longkmie kaba la shah rah ha ka um saw wat haba u la pyrshang ban paring ïa ka na kti khnang ban pyllait im ïa ka. Da ka jingshlur ka jong u, u la ryngkoh shapoh um bad ha kaba khatduh u la ïoh ban pyllait im ïa ka hadien ka jingïakhun kaba shitom bha hapoh um na ka daw ka jingkhlain shaba palat ki lat lat jong ka umsaw.
Shwa kane, une u heprit u la ïoh ban pyllait im ïa uwei u heprit uba 10 snem ka rta uba la ngam jyllop ha kshaid Umkrem.