Shillong, K’lyngkot, 20: U Chief Adviser jong ka UDP u Bah Bindo M. Lanong ha ka sngi Thohdieng u la buh jingkylli ïa ka jingshim rai jong ka Sorkar Jylla ban khang khyrdep noh ïa ka Mawmluh Cherra Cement Limited (MCCL) kaba don ha ka shnong Sohra.
“Balei kin khang khyrdep noh? Haba ki riewshimet na Delhi, UP bad kiwei kiwei ki jaka ki lah ban pynieng ïa ki karkhana pynmih dewbilat ha ka jylla, balei ka MCCL, ba ka jylla ka don la ka jong ka bhah, balei yn khang khyrdep noh ïa ka MCCL? la ong u Bah Bindo.
“Ki ar tylli ki jingkhleh bakongsan jong ka dewbilat ki long u dewiong bad u mawshun bad ka MCCL ka ieng ha ka jaka ba don u dewiong bad u mawshun. Kine ki ar tylli ki jingkhleh ki don hajan jong kane ka kharkhana dewbilat. Balei kin shu khang khyrdep noh ïa kane ka karkhana pynmih dewbilat bad ban ailad pat ïa ki karkhana shimet kiba rit ba kin mih kum ki tit?” la buh jingkylli u Bah Bindo.
U Bah Lanong u la buh jingkylli ruh ïa ka jingphiel jong ka Sorkar ban pynskhem ïa ki nonghikai bad ïa ki nongtrei kiba la trei palat 15-17 snem.
Katkum ka jingong jong u, bun na ki nonghikai bad ki nongtrei kiba la shakri la bun bun snem ki la shah ñiew kum ki nongtrei sngi ha ka jylla.
Haba kdew ïa ka rai ba la pynmih da ka Iingbishar High Court ka Assam ba kito kiba la dap pura lai snem ka jingshakri ki dei ban ïoh ka jingshah pynskhem, u la ong, “lada ngi wad tang lai snem kam pat biang, kam pat shong nia, dei ban buh haduh san snem, buh haduh hynriew snem hynrei ki briew kiba la shakri palat 10 snem kim pat shah pynskhem satia bad ki don ruh katto katne na ki nongtrei kiba la shongthait kum ki nongtrei sngi. Balei ka Sorkar kamlah ban shong bad ban pyrkhat bad kum ka nuksa na ka bynta kito kiba la dap pura san snem lane hynriew snem lane hynñiew snem phi lah ban pynskhem noh ïa ki kum ki nongtrei bapura.
Ha kaba ïadei bad ka jingdheng kali ha nongbah Shillong, u Bah Lanong u la ong, “balei ym lah ban shna lehse wat tang kawei ruh ka Fly Over tang na Happy Valley lane Laitkor lane Mawblei haduh Mawlai lane Mawiong. Ha Guwahati, bun tylli ki Fly Over ki mih tang hapoh shi snem ar snem katba ha Meghalaya wat tang kawei ruh ka kam don. La kumno kumno, lada don tang kawei ka Fly Over kan weng ïa ka jingeh kaba 25-30% kaba ngi mad manla ka sngi.”
Shuh shuh u Bah Lanong u la ong ba ka tnat ka Rep ka Riang ka la phiel ha ka Jylla. U la ong ba u kyndit ban ïohi ïa ki briew ha ki nongkyndong kum ha Nongkrem, Pomlakrai, Umphyrnai kiba ju pynlut sngi tang ha kaba rep phan, kajor, kubi bad u sohlakum.
“Phin ym lap ïa kiwei pat ki jait jingrep, namarba kam don ka horticultural project lane ka ban pynïar kum ha ki jaka ha Nongkrem. Ngi shu shahniah ha ki nongrep bad lada ki nongrep kim lah ban pyndap wat tang ïalade ruh hato kan jia aiu ïa ki paidbah kiba im ha ki jaka sor,” u la ong.
