Shillong, Lber 24: Ka Dorbar Shnong Mawrah, East Khasi Hills, ka la ïoh ïa ka khusnam kum ka nongjop ha ka 4th Water Sustainability Award kaba dei ka National Award, 2024-25 na ka jingshna ïa ka Mawrah Reservoir Project ryngkat ka Sorkar Jylla, ban ïakhun ïa ka jingkyrduh um namar ka jingkylla ka suiñ bneng.
Ka Dorbar Shnong Mawrah ka la ïoh ïa kane ka khunsnam ha ka kyrdan Excellence in Participatory Water Management for Enhancing Water Management through Community Participation” ba la pynlong da ka The Energy and Resources Institute (TERI) ryngkat bad ka United Nations Development Programme (UNDP), ka Ministry of Jal Shakti (MoJS), ka Department of Water Resources ha Jacranda Hall, India Habitat Centre, New Delhi.
Kane kadei ka sien kaba nyngkong ba ka sienjam kaba la shim da ka Tnad Soil & Water Conservation kan ïohpdiang ïa ka khusnam ha kaba ïadei bad ka jingpyntreikam ïa ka projek da kaba ïatreilang bad ka shnong ka thaw bad kane ka khusnam kadei ka jingai jingithuh ïa ka jingtrei kaba khlem shongthait jong ka sorkar ban pyntreikam ïa ka sienjam kaba ïadei bad ka jingkylla ka suiñbneng lyngba ka jingïatreilang bad ki shnong ki thaw.
Ka Water Sustainability Awards ka dei da ka jingthmu ban pynshlur ban pynurlong ïa ka Sustainable Development Goal 6 (SDG -6) halor ka um, da ka lynti ban pynduna ïa ka jingpyndonkam palat pud ïa ka um da baroh kiba don bynta lang. Kawei na ki mat ban ïoh pdiang ïa ka khusnam ka dei ka jingtreikam bad ka jingdon jingmut jong ka projek (climate resilient water resources management), ka jinglong kyrpang ka jong ka sienjam kaba la shim.
Ka kynhun ki nongbishar ka kynthup ïa ki riewstad na ka UNDP, MoJS, Niti Ayog, TERI bad kane ka kynhun ki nongbishar ka la pynpaw, “Ka projek ka Mawrah kadei ka sienjam kaba pynthikna ïa ka jingïatreilang hapdeng ka sorkar bad ka shnong ka thaw, ha ka ban ïaleh ban pynneh pynsah ïa ka um, kaba ïarap ha ka ban kyntiew ïa ka jingim jong ki paidbah ha ka shnong bad ka jingkongsan kane ka projek ka ïaid ryngkat lang bad ka jingseisoh jong ka SDG Goal 6”.
Ha kaba ïadei bad ka jingkylla ka suiñbneng, ka sorkar Meghalaya da kaba ïatrei ryngkat bad ka Asian Development Bank ka la tyrwa ban pyntreikam 100 % ïa ka Climate Financing Climate-Adaptative Community-based Water Harvesting Project ban pynthikna ba kan don ka jingïashimbynta jong ka imlang sahlang. Kane ka projek kaba kot 62.5 million USD [US$50.00 million (ADB) & US$12.50 million jong ka sorkar jylla kan kynthup ïa ka jingshna ïa ki 532 tylli ki jingtei jong ka Climate Resilient Water Harvesting, ki kam kiba ïadei bad ka Command & Catchment Area, ki prokram ki ban kyntiew ïa ka jingim ki briew, ban pynkhlaiñ ïa ki jaka pule, ki prokram ai jinghikai, ka jingpyndonkam ïa ki kor ki bor teknoloji ha kylleng ki bynta jong ka jylla.
Ka Sorkar Meghalaya ka la dep ïasoi ban shim ïa ka ram ha u Nohprah 2024 bad ka jingpyntreikam ïa ki projek ka la sdang ha kylleng ki district. Kane ka projek kan pynkhlaiñ ban ïakhun pyrshah ïa ki jingeh kiba mih na ka jingkylla ka mariang. Da kaba thaw ïa ki jaka pynlang um ha ka jaka kaba 415 Hektar bad ka jingpynlang um kaba kot 12 million cubic meter, lyngba ka jingïatreilang bad ki shnong ki thaw.
