Guwahati, Naitung 09 : Ka kynhun Special Task Force (STF) jong ki Pulit ka Assam, mynta ka Sngi U Blei, ki la ïoh ban kem ïa u briew uba suba donkti ban khaïi ïa ki pisa thok (fake Indian currency notes) ha Guwahati.
Une u briew u kyrteng u Bulbul Alam (31). ïa une u briew la kem da ka STF na ka ïingsah wai jong une u briew kaba don ha Dakhingaon, Hatigaon, Guwahati. Une u briew u dei na ka shnong Alooguti Chhar jong ka Barpeta.
Ha ka 5 tarik Naitung, ki pulit STF ki la kem ïa uwei u briew ba kyrteng u Md Sahanoor Islam namar ka jingpynïaid ïew ïa ki pisa thok bad ïa une u briew la kem najan ka ISBT bypass, Guwahati.
Hadien kane ka jingïohkem, ki Pulit ki la leit ban khynra ïa ka ïingsah jong une u briew ha Ahom Gaon, Guwahati bad ïoh kurup ïa bun bah ka pisa thok da ki lut 500 ha ryngkat ki kot sada ba la ot ha ka dur jong ka pisa.
