ïoh kem 2 ngut ba suba donkti pynïap bad lynthem maw ïa u rangbah ha Pahammawleiñ

Nongpoh, Lber 21: Hadien ka jingjia shah pynïap dusmon jong uwei u rangbah briew naka shnong Pahammawleiñ, Ri Bhoi ka ba la pynpar ñiang khriat ïa kiba bun balang ha ka ba ki runar kila pynïap dusmon bad lynthem maw haduh ba ki bynta jong ka khlieh kala pra, ki pulit ka Ri-Bhoi khlem shongthaid kila buddien ïa katei ka kam ban pynlong ka jingtohkit, bad dei hadien hynnin ka miet ki pulit kila ioh ban kem noh ïa 2 ngut ki runar ba suba donkti ha katei ka kam.
Kum ban shu pynpaw ba u tei u rangbah u la shah pynïap haka 9 tarik Lber, la tip kyrteng kum u Bah Elius Ryndong (60) naka shnong Pahammawleiñ, 20 mer, Ri-Bhoi District, ha kaba ki runar kila pynïap dusmon ïa u haka por ba u dang thmu ban leit sha lyngkha trei ba u la mih na ïing naduh ka por 7 baje mynstep hynrei khlem wanphai ïing shuh haduh ka por mynmiet bala buh ïa ki bahaïing hadpeng ka umdum ban ioh sngew pynban ïa ka khubor ba u la shah pynïap dusmon haki runar hapdeng ka jinglyngkien ka snam haka lynti khlaw ban leit sha lyngkha.
Haba kren sha ki lad pathai khubor naka liang u heh pulit ka Ri Bhoi u Giri Prasad u la ïathuh ba hadien katei ka jingjia kaba sngewtriem bad ka jingshah pynïap jong u tei u rangbah, ki pulit ki khlem shongthaid ban pynlong ka jingtohkit bad ban pynthikna ban iohkem ïa kiba donkti ha katei ka kam, bad dei haka jingbuddien ki pulit, hynnin ka miet haka por 8 baje eiei ki ioh ban kem 2 ngut ki briew ba suba donkti ha katei ka kam ba kynthup ïa u Bah Prince Abraham Sylliang (35) naka shnong Pahammawleiñ 20 mer, bad u Sushil Kurbah (72) naka shnong Kliar Umdap Duki, Ri-Bhoi District katkum ka Nongpoh PS Case No. 26(03)2023 U/S 302 IPC.
Naka liang u SP ka Ri-Bhoi u la pyntip ruh baka jingtohkit mynta ka dang ïaid shakhmat bad la phah noh ïa kitei ki 2 ngut sha ïingbishar, da kaba pynthikna ruh ba ki pulit ka Ri-Bhoi kin nym ailad ïaki kam sniew ban roi haka District bad pynthikna ba ki paidbah kin shongsuk shongsaiñ.
Hapoh Assembly mynta ka sngi, u Bah Mayralborn Syiem, MLA ka Nongpoh, u la wanrah ïa kamat jingïatai halor kane ka jingjia ïa u Bah Elius Ryndong, ha kaba u la pynpaw ka jingsngewkhia ba ki Pulit kat haduh hynnin ka sngi kim pat shym la kem ïano ïano ruh. Haba wanrah ïa ka Zero Hour Notice lyngba ka khubor na la mih ha Mawphor, u Bah Mayralborn, u la ong ba une uba shah pynïap udei nongpyndap ïa ka ïing ka sem bad uba don ruh bun ngut ki khun bad ka kurim. “Ka jingshah pynïap jong u,. ka la ktah shibun ïa ka ïing ka sem”, u la ong.
U la dawa ruh ba dei ban ai ka jingpynsajia kaba tyngeh ïa ki riew runar kiba shim ïa ka jingim jong une u rangbah wat mynsngi mynshai ruh.