Nongpoh, Risaw 30: Ka jingphohsniew jong ki nongrep sohtrun haka shnong Mawphrow ha Ri-bhoi District kala urlong mynta ka sngi hadien ba katei ka shnong kala ioh ban plie paidbah syndon ïaka jaka buh bad jaka shna ne pynmih umsohtrun bad ki jingbam bapher bapher bala pynmih na u Sohtrun (Pineapple Processing Unit and Stockyard) da ka jingangnud ban kyntiew ïaka kam rep sohtrun ha katei ka thaiñ khamtam ka ioh ka kot bad ka iohkam iohjam.
Ïa katei ka Pineapple Processing Unit bad Stockyard la shna lyngba ka skhim Provision to the Article 275 (1) jong ka riti synshar ka ri India jong u snem 2020-21 haka jinglut kumba 70 lakh jong ka Ministry of Tribal Affairs bad ïa katei ka Processing Unit la aiti sha ka Committee jong ka shnong kaba la shañiah pat hapoh ka jingpynïaid jong ka Iasnohktilang Village Organisation kaba kdup kumba 10 tylli ki SHGs bala wan ban plie paidbah ïaka mynta ka sngi da u Bah Mayral Born Syiem MLA ka Nongpoh kum u kongsan.
La sakhi ruh ha katei ka sngi da ka jingdonlang ka kong D Sohtun Director ka tnad Horticulture ka jylla, Kong F.N Sun, District Horticulture Officer Ri Bhoi District, Kong D Lyngdoh, District Agriculture Officer Ri-Bhoi District, Bah Anthony Maring Rangbah Shnong, ki ophisar naka tnad Horticulture, ki longkmie hapoh ka shatri jong ka ïasnohktilang VO bad kiwei kiwei ki riew rangbah.
Haba kren ha katei ka sngi naka liang u Bah Mayral Born Syiem MLA ka Nongpoh u la pynpaw ka jingsngewkmen kaba khraw ba kum ka shnong kala ioh ïa katei ka jaka shna bad pynmih ïaki umsoh bad ki jait jingbam bapher bapher bala pynmih na u Sohtrun ba ka jingangnud bad ka jingphohsniew jong ki paidbah kala urlong dei namar ka jingtrei shitom ka jong ki.
U la ong ruh ba ka shnong Mawphrow ka dei kawei naki shnong kaba la kiew sted haka thaiñ haka liang ki kam pynroi ka dei namar ka jingtbit ki nongïalam bad ka jingïatylli jong ki paidbah, bad ka Village Organisation ha katei ka shnong kadei kawei naki VO kaba paw haki kam ba ka trei kaba la ioh khusnam teng ruh haki snem bala dep bad kumba la shimti da ka VO ïa katei ka Processing Unit kyrmen skhem ba katei ka kan dang lah shuh shuh ban kyntiew ïaka kam kaba ki trei khamtam haka jingpynmih ïa sohtrun, kumba bun naki dkhot ka SHGs kila pyndep ruh ïaki jinghikai bapher bapher.
U la ong ruh lyngba katei ka project ym tang ba ka kyntiew ïaka kam rep bad pynmih sohtrun hynrei kan long ruh ka jingkyrkhu kaba khraw ba ki longkmie bad ki nongrep ha katei ka shnong ki lah ban ïeng hala ki jong ki kjat khamtam ba kan lah ruh ban aikam aijam ïaki khun samla ym ban ap tang haki kam sorkar, ha kaba naka liang u MLA u la kular ruh ban ïatreilang bad ban ïarap naka bynta kiwei kiwei ki jingdonkam ha katei ka shnong.
