Mawkyrwat, Risaw 30: Ka ophis u District Sports Officer (DSO) jong ka South West Khasi Hills District ha ryngkat da ka jingïatreilang bad ka Mawkyrwat District Sports Association (MDSA) lem bad ki khynnah Grassroots Centre bad ki Khelo India Centre, South West Khasi Hills District, ki Coaching ki la pynlong ïa ka jingtam ïa ki plastik ne ka Cleaning Drive ha shilynter jong ka surok bah ha ïew Mawkyrwat.
Ïa kane ka prokram, la pynlong khnang kum shibynta ban ïashimbynta ha ka “Fit India Freedom Run 4.0 Swachh Bharat Swachh Bharat” jong ka Ri India lyngba ka Ministry jong ka Youths Affairs ban rakhe ïa kane ka sngi ban lehkhuid ban ym bret pathar ïa ki plastik bad ki ñuit ha ki lynti ki surok da kaba ki la sdang na madan Artificial Turf, MDSA, Nonglang bad wan haduh hapoh ïew Mawkyrwat.
Hadien ka jingtam ïa ki plastik, u bah Y.G. Lyngdoh uba dei kum u Working President jong ka ka Mawkyrwat District Sports Association (MDSA) haba kren ha ki lad pathai khubor, u la pynpaw ka jingsngewnguh ïa ka ophis jong u District Sports Officer jong ka South west Khasi Hills District bad lyngba ka jingkitkhlieh lang baroh naduh ki khynnah Grassroots Centre, ka Khelo India Centre jong ka South west Khasi Hills District ha ryngkat ki nongtrei napoh jong ka ophis jong u DSO ka la pynlong ïa kane ka prokram kaba jop.
U la ong ruh ba kane ka long ka nuksa ban pyntip sha ka pyrthei ba ka jinglehkhuid da kaba phikir ban bret pathar ïa ki plastik ne ki jaboh kan wanrah ïa ka khuid ka suba bad ruh ban lait na shibun ki jingpang kaba wanrah ruh ïa ka mariang kaba itynnad bad kaba pyngngad.
Namarkata, lyngba kane ka prokram la kyntu ba lyngba kine ki khynnah rit kin long ka nuksa ïa baroh ki paidbah nongshong shnong bad ruh ïa ki briew ba kin shim nuksa ban wanrah ka jingkylla ha ka dong ka thaiñ bad ka jaidbynriew baroh kawei namar ka jingleh khuid ka wanrah ka jingkoit jingkhiah ha baroh ki liang.
