Shillong, K’lyngkot, 14: Kan long ka jingsarong ïa ka jylla Meghalaya hadien 50 snem ka la ïoh ïa ka kynhun Women Commando Unit ba nyngkong eh ha ka sngi Saitjaiñ.
Ïa kane ka kynhun ba la jer kyrteng kum ka Meghashakti Commandos Warriors, la pynrung ha ka Special Force (SF)-10 ha ka jingleh burom kaba la long ha 1st MLP Battalion ha Mawiong, ha kaba la sakhi lang da u Myntri Rangbah ka Jylla u Conrad K. Sangma.
Haba kren kum u Kongsan u Conrad Sangma u la ïaroh ïa ka Meghashakti Commandos Warriors, bad ong ruh ba ka Sorkar ka la trei borbah ban pynbiang ïa ki jingdonkam na ka bynta ka tnat Pulit khnang ban wanrah ïa ka shongsuk shongsaiñ ha ka Jylla.
Shuh shuh u la ong ruh ba ka Sorkar ka dang bun ban leh na ka bynta ka tnat Pulit. U la ai khublei ruh ïa ka tnat Pulit jong ka Jylla kiba la trei shitom bad kiba la aiti lut met bad mynsiem na ka bynta ban ai ïa ka jingshakri sha ki paidbah nongshong shnong ka jylla.
U Director General of Police ka Jylla u Dr. LR Bishnoi u la ïathuh ba ïa kane ka kynhun la ai jinghikai pyntbit ban khynra lehnoh, ban pyllait im ïa kiba shah rahbor bad ban pahara ïa ki heh ki haiñ.
Haba pynpaw ba kane ka kynhun kan long ka jingsarong ïa ka jylla Meghalaya, u Bishnoi u la ong ba ka Meghashakti Commandos Warriors ka dei ka kynhun kaba ar hadien ka Veeranganas ha ka jylla Assam.
U DGP u la ai khublei ïa ka Sorkar Jylla bad ïa ka tnat Kam Pohing kiba la ai ka jingkyrshan ban pynurlong ïa kane ka jingthmu.
“Ha kaba sdang eh ngi la khot haduh 200 ngut ki kynthei bad hadien ba la bishar bniah ïa ka bormet, ka rukom kilan met, ka jingstet mareh, ka bor pyrkhat bad ïa ka jinglong jong ki bad na kine ngi la jied tang 70 ngut ha ka wat kaba nyngkong bad na kine la jied sa tang 52 ngut kiba kham tbit,” la bynrap u DGP.
