Shillong, Rymphang 27 : Ka Myntri ka tnad kam rep kam riang ha ka Jylla ka Kong Ampareen Lyngdoh ka la ïathuh ba ka Tnad ka la ïoh jingtip ba ka don ka jinghiar jong ka dor u synsar hapoh ka Jylla.
Haba jubab ïa ka jingkylli ha ïing Dorbar Thaw Aiñ, ka Myntri ka la ïathuh ba ka daw ka long ba ki Jylla ba marjan kata ka Assam, Mizoram, Tripura bad Arunahcal Pradesh kila pynkiew bha ïa ka jingpynmih synsar ha la ki jong ki Jylla ha kine ki 2-3 snem.
Ka pyntip ba ka jingeh jong ka jaka rep synsar ha Meghalaya ruh kala nang kiew. Ka jingkynshew (stock) synsar ba naduh u snem bala leit, ka dang don ha ki kudam. Ka jingkiew ka jingpynmih synsar na ki Jylla ba marjan kala nang pynbun ïa ka mar ha ïew, kaba la lam pat sha ka jinghiar dor u synsar”.
Halor ki sienjam bala shim ban leh eiei halor kane ka jinghiar dor, ka Myntri kala ïathuh ba ka Mawiong Wholesale Market ka don ïa ki kudam ba ngiam ban thep palat 21,000 MT. Bun na kine ki kudam la pyndonkam ban buh ïa ki synsar bala thad ha ka por ba hiar dor u synsar, kumta kala plie lad ïa ki nongrep ba kin ïoh kham heh ka dor”.
Ka jingpoi mar manla ka sngi bad ka dor ïew jong u synsar la ju thep ha ka AGMARKET portal bad MEGAMB portal kaba lah ban ïohi lut da ki paidbah/nongrep ba kin tip ïa ka dor ka mur.
