Khliehriat rymphang 29: Ka Rymbai Government Secondary School, ka la ioh ïa ka ïing skul kaba thymmai ha kaba mynta ka sngi la wan ban plie da u myntri ka sorkar jylla uba dei ruh u MLA ka thaiñ, u bah Kyrmen Shylla, la ïa don ryngkat lang ruh u Deputy Commissioner ka East Jaiñtia Hills District, u Abhilash Baranwal, IAS, u MDC ka thaiñ, u bah F. Bareh, ka Additional Deputy Commissioner, ka kong J.U.Kharpuri, u Joint Director of School Education and Literacy, Government of Meghalaya, u bah L.S Lyngdoh, ka In Charge District School Education Officer, East Jaiñtia Hills District, ka kong P. Dkhar,ki nonghikai bad ki khynnah skul.
Haba kren kum u kongsan, u bah Kyrmen Shylla u la pynpaw ka jingkmen ba kane ka skul ka la ioh mynta ïa ka ïing skul kaba thymmai, u la ai ka jingkitbok kitrwiang ruh ba ka skul kan nang iaid shaphrang na ka por sha ka por, u ai khublei ruh ïa ka School Managing Committee, ki nongïalam shnong, ki contractor kiba shna ïa ka skul , u la ong ruh ba u dang bud dien ban pynurlong ïa kane ka skul ban kyntiew kyrdan sha ka higher secondary.
U kongsan u la kren ruh shaphang ka jingkyrduh kam, halor kane u kyntu ïa ki paidbah ba kim dei ban phai khmat than tang sha ki kam sorkar hynrei ban wad ki lad ki lynti ban seng da ki kam la jong ruh lyngba ki skim bapher bapher, u pynshlur ruh ba ki dei ban shim ïa ka kam ri jingri, ka kam rep, ban kyntiew ruh ïa ki kam jngohkai pyrthei, ki kam ialehkai sport bad kiwei kiwei ki jait kam ki ban kyntiew ïa ka ioh ka kot.
U Deputy Commissioner, East Jaiñtia Hills District, u pynpaw ka jingkmen ba kane ka skul ka la nang kiew na ka por sha ka por, u la kular bad pyntikna ba na ka liang ki bor district ruh ki ai lem ki jingkyrshan katba lah ban kyrshan lem ïa kane ka skul khnang ba kane ka skul kan nang kiew shuh shuh.
. Ka Head Mistress jong ka Rymbai Government Secondary School, ka kong Y. Lamare, ka la pynsngew ïa ka history jong ka skul naduh ka por ba seng kata naduh u snem 1960 haduh mynta ha ka jhuh ka por ka la aiti ruh ïa ka memorandum ha u myntri ka sorkar jylla, kane ka memorandum ka dei halor ka jing pan ban kyntiew kyrdan noh ïa ka skul sha ka higher secondary, ban ai ïa ka hall (multi-purpose hall) bad ban shna ïa ka madan ialehkai basketball ha skul.
