Shillong, Lber, 8: Ryngkat lang bad ka pyrthei baroh kawei, ka tnat Social Welfare ka Sorkar Jylla ka la ïashim bynta ban rakhe kyrpang ïa kane ka sngi da ka jingïatreilang bad ka State Hub for Empowerment of Women bad ka Meghalaya State Rural Livelihoods Society ha ka jingïalang kaba la long ha State Convention Centre, Shillong.
Ha kane ka sngi, ka tnat Social Welfare ka la pynkup burom ïa ki longkmie kiba don ïa ki sap kyrpang ha ka jingim jong ki.
Haba kren ha kane ka sngi, ka Myntri jong ka Sorkar Jylla ka Dr. M Ampareen Lyngdoh ka la ong ba kane ka sngi ka dei rakhe namarba ngi la kynjoh ha ki thong bapher bapher ha ka jingim.
“Ngi donkam ban rakhe lang kawei, ki longkmie ruh ha la ki ing ki sem, ki khynnah kynthei ruh ki rakhe ïa kane ka sngi kaba kyrpang namarba ka Sorkar baroh kawei ka ri India ryngkat bad ka phang pdeng jong kane ka sngi,” la ong ka Dr. Ampareen.
Ka la ong shuh shuh ba ka Sorkar Meghalaya ka la mang pisa shibun bha na ka bynta ki kynthei kaba kot T. 5271 klur.
Ka la bynrap ba ngi hap ban pynthikna ba ki kynthei ki dei ban ïohlad ban ïashim bynta ha ki lad kamai jakpoh, ngi kyrmen ba ngin pynkhlain ïa ka ïoh ka kot kum ki longkmie bad ban pynskhem ïa u païa jong ka ing ka sem. Lyngba ki kynhun ïatreilang ngin sa lah ban ïohi ïa ka jingïaid shaphrang jong ki kynthei ha ki liang bapher bapher.
“Ka Sorkar kan sa bei jingïarap 18% na ki 5 hajar tylli ki jaka ai jingsumar ïa ki kynthei,” ka la bynrap. Ka Jylla Meghalaya ka la pynkhlaiñ ïa ki kynhun ïatreilang kiba trei tang da ki kynthei bad da ka lynti yn sa lah ban kyrshan jingïarap ïa kine ki kynhun ba kin nang kiew shaphrang.
Ha kane ka sngi, la ïadon lang ka Chairperson jong ka Handicraft and Handloom ka Kong Santa Mary Shylla, u Commissioner & Secretary ka tnat Social Welfare u Pravin Bakshi bad kiwei kiwei.
La sam ruh ïa ki khusnam sha ki kynthei kiba la pynpaw pyrthei ïa ki sap ki phong jong ki, ba kynthup ïa ka Nambi Jessica Marak (kaba long ka nongshet jingshet), ka Kong Kmoiñ Wahlang ka nongmareh marathon, ka Kong Bonifilia Shullai (nongïalehkai sports), ka Kong Sidalin Marbaniang (ka nongsengkam), ka Kong Ratna Rai bad ka Kong Pdiangsngewbha Pohti (ki nongseng ïa ki kynhun ïatreilang.
La sam ruh ruh ïa ki kor suhjaiñ sha ki kynthei da ka tnat Superintendent of Training for Women in Need of Care & Protection, Social Welfare Department.
