Nongpoh, Jymmang 24: Ki nongïalam ka KSU, Nongpoh Circle mynta ka janmiet ki la ioh ban bat ïa uwei u bar jylla katba u dang ïaid kjat ha Nongpoh, kaba dei hadein ka jingsuba ba une u bar jylla u lah ban kit kiei kiei ki tiar hapoh ka pla kaba la suba katkum ka jinglong jingman jong u kaba u la pypaw shabar ba ka lah ban don kaei re kaei ka tiar kaba u kit hapoh ka pla jong u.
Ki nongïalam ka KSU, Nongpoh Circle ha ka jingïalam u President ka Circle, u Bah John Lyngdoh lem bad ki dkhot ki la buddien ïa une u bar jylla, hynrei hadien ba la poi ha janpoi ha Saiden ki la bat noh ïa une u bar jylla bad kaei kaba kham phylla ka long ba hadien ba la ioh bat ïa u la lap bun jaid ki tiar ki tar bad ki kot kiba dei shaphang ki mrad kiba u la thep hapoh ka pla.
Na ka liang ka KSU ki la plied ïa ka pla bad hapoh katei ka pla la lap u kynja kymbat ba la suba ba u dei u Ganja, ki simcard phone, ki prek, bad hapoh katei ka kot la tah da ki snieh mrad bapher bapher bad ruh ki thapniang jong ki sim kaba la buh umdum ïa ki nongïalam ka KSU.
Haba la kylli pyrthew da ki nongïalam ka KSU, utei u bar jylla u kam ïa lade ba u dei u Anti-Christ bad ruh ba u dei u nonghikai hynrei um don pat kano kano ka jingpynshisha ba u dei u Nonghikai bad lait noh tang kitei ki tiar ba la lap na ka pla jong u.
Kaba la buh hapdeng ka umdum ïa ki nongïalam ka KSU ka long ba na katei ka pla la lap ruh ki kynjaj jingthoh ha ka ktien Hindi, ki syntiew ba la ïap noh, ki snieh mrad bad ki sniew bsein kiba kim tip satia kaei kaba utei u bar jylla u thmu ban leh ne pyndonkam.
Hadien ba la ioh kurup ruh ïa kitei ki tiar ba phylla na utei u bar jylla, ki nongïalam ka KSU ki la leit ban aiti noh sha ka tnad Wildlife ha Nongpoh, namar jan baroh ki tiar kiba don hapoh katei ka pla jong u ka dei shaphang ki mrad bad lehseh b aune u bar jylla u don bynta ha ki kam shalan beain ïa ki mrad b akum ka seng ka sngewkhia ba ha kine ki sngi bun na ki mrad ki la sdang ban duhjaid na ka jingpynïap pathar ïa ki mrad.
Na ka liang u Bah John Lyngdoh, President ka KSU, Nongpoh Circle hadien ba la aiti ïa utei u bar jylla sha ka tnad Wildlife, u la buh ka jingkyrpad ruh sha ka tnad Wildlife ba kin tohkit bniah bad ban leh katkum ki kyndon jong ka ain, namar kaei kaba pynsngewpher ïa ka seng ka long b aune u bar jylla u don kita ki jaid kot kiba dei shaphang ki mrad bad ruh la sakhi ïa ka jinglap naduh ki snieh mrad kum ka sniew bein Cobra, ki thapniang jong ki sim bapher bapher bad kiwei kiwei dei ki tiar ba phylla.
Une u bar jylla uba nang ban kren Khasi tiak tiak la tip kyrteng kum u Shaikh Sharin Hasan bad u kam ia lade ba u dei uba shong basah ha Rynjah ha Nongbah Shillong bad une u bar jylla mynta u don ha ka jingpeit jingkhmih ka tnad Wildlife hadien ba la leit aiti da ki nongialam ka KSU mynta ka janmiet ha ka ophis ka tnad Wildlife kaba don ha Nongpoh.
