Shillong, Nailar 21 : U National General Secretary ka NPP ba dei ruh u Symbud Myntri Rangbah ka jylla, Bah Sniawbhalang Dhar u la ong ba ka Congress ha ka Meghalaya imat ka lah ban jah kyrteng noh.
Haba kren bad ki lad pathai khubor, u Bah Sniawbhalang u la pynkynmaw ruh ïa ka jingwan pynïasoh NPP noh jong ki lai ngut ki MLA Congress bad ong, “Kane ka paw ba kan poi sha kata hi ka lynti.”
Kum u wei na ki nongïalam barim ha ka Congress, u Bah Sniawbhalang u laong ruh ba ba u lashim ïa ka rai ban phet noh na ka Congress ha u snem 2017 hadien ba u la tip ba katei ka party ka la jan ngam.
“Balei ba nga poi noh sha ka NPP kadei namar nga tip ba ka Congress kan sa ngam noh bad ka jingiohi lypa jongnga ka la urlong bad nga lah ban ong ba kadei hi ruh. Kumta ha u snem 2017 -2018 nga la pynïasoh noh sha ka NPP namar nga tip ba ka Congress kan sa ngam noh ha kano kano ka por,” u la bynrap biang.
Shuh shuh u la ong ruh ba ki lai ngut ki MLA Congress ki la pynïasoh sha ka NPP ha ka por kaba biang eh.
Halor ka jingkylli, u Bah Sniawbhalang u la ong ba ka party ka long kaba kloi ruh wat ban pdiang burom ïa u nongïalam ka Congress ba dei ruh u MP barim ka Shillong Parliamentary constituency lada u wan ban pynïasoh. “Lada u wan ngi long kiba kloi ban pdiang sngewbha ïa u.”
Halor ka jingkynnoh jong u Bah Pala ba ka NPP ka pyndonkam da ka pisa beain ban khring ïa ki MLA Congress, u Bah Sniawbhalang u la ong, “Phi lah ban kylli na ki MLA jong u hi kiba la wan ban pynïasoh bad ngi. Ngam dei satia uba dei hok ban jubab halor kata. Kane kadei ka jingkynnoh jong u hynrei ki MLA jong ki ki la pynpaw shai ha ka sngi baki wan pynïasoh ba kadei eh ha kyrteng ka kam pynroi ba ki wan. Ki lah ban kynnoh hynrei kam dei kaba shisha, ka dei tang ka jingkynnoh bym don nongrim ei ei.”
