Jowai, Nailar 21 : Ka Hynñiewtrep Border Disputed Redressal Forum (HBDRF) hynnin ka sngi 17 tarik Nailar kala ïa kynduh ïa u MP ka Shillong Parliamentary Seat u Dr. R. J Syngkon ha Saint Clareth Parish Hall Phramer West Jaiñtia Hills District ban pynsngew bad ai jingthoh halor ki jingeh ki paid nongshong shnong kiba shong basah haki jaka khappud bad ka jingïapynbeit pud hapdeng ka jylla Meghalaya bad Assam.
Haka jingthoh ne ka dorkhas ka Forum kala ïathuh shaphang ka jinglong trai man trai jong ki Khasi Pnar ne ki Labang Nangphyllut halor ka khyndew ka shyiap u pud u sam naki khana pateng bad ki jingthoh jingtar ne ki Historical facts .
Ka Forum ka pynpaw ruh ïaka jingsngewsih halor ka jingleh donbor jong ka sorkar Assam haka por ba thaw ïa ki District Councils naka bynta ki jaid bynriew riewlum ka jylla Assam haka snem 1949-50 A D da kaba khlad bad pynïasoh jubor ïaka Elaka Labang Nangphyllut & Pangam Raliang (Block -1) sha United Cachar & Mikirs Hills haka jaka ban don bad ka United Khasi Jaiñtia Hills District Councils kumba juh long naduh hyndai hynthai kulong kumah.
La ïathuh ruh ïaki jingshah lehbeiñ shah thombor ki paid Khasi Pnar jong kane ka thaiñ naduh baki la shah pynhap jubor sha Karbi Anglong Assam. La kdew ruh ïaki Notification ne ki shithi sorkar kaba ka Assam ka pynpaw ïaka jingkubur baka la leh bakla halor ka ba pynhap jubor ïa kane ka Elaka shapoh United Cachar Mikirs Hills. Bad ïaki Shithi baka la phah sha ki District Councils, ka United Khasi & Jaiñtia Hills bad ka United Cachar Mikirs Hills ba kin shinkhia ban pynbeit ne pyndep ïaka kam ban re-transfer biang ïaka ne ka jaka sha United Khasi Jaiñtia Hills District.
Ka Forum ka pynpaw ruh ïaka jingartatien baka jingïa pynbeit pud hapdeng ka Assam bad Meghalaya kan pynïoh ïaka hok jong ki, kata ban pynphai biang ïakane ka jaka sha Meghalaya. Kumta ka Forum ka kyntu bad kyrpad ruh ïa u MP ba un sngewbha ban shim khia bha ïakane ka kam bad ban kren hapoh Parliament bad ruh bad ki heh ki haiñ ka sorkar pdeng naka bynta ban ai ka jingbthah iakine ki ar sorkar ban ym don kano kano ka jingleh shilliang lane ka jingleh arsap haka ba pynbeit ïa u pud u sam.
U MP u la pdiang sngewbha ïaka jingthoh ne ka Representation ba la aiti da u Chairman ka Forum U Bah Chandame Sungoh bad kular ruh ban shin khia ïakane ka kam Ban pule bniah ïaki jingthoh bad ban leh ïakaba donkam. U ong ruh ba lada don kam te yn sa ïakynduh biang ban ïoh ïa kren kham bha.
