Nongpoh, Naitung 21: Lah ban ong ha kum kane ka pyrthei hiran haka ioh ka kot bad ka iohkam iohjam bun naki samla ki kylla lamwir, bad don kiba tlot haka jingmut jingpyrkhat ki poi ruh sha ki kam sniew, hynrei ha kum kane ka por 2 ngut ki samla kiba dei ruh shi bakha kila long ka nuksa ïaki khun samla ba kim dei ban duh jingkyrmen haka jingim hynrei ka jingtrei shitom bad ka jingangnud ban poi shaka thong ka dei ka mon jong uwei pa uwei u khun samla.
Kitei ki 2 ngut ki samla ki dei u Samla Dr Esra Syiem u ba la plie ïaka dukan die dawai bad sumar ïaki mrad bala tip kum ka Bhoi Veterinary Clinic harud surok bah NH 6 ha Pahamsohthri bad u Samla Peter Syiem u ba la plie ïaka dukan bam kaba la ai kyrteng kum ka Eastern Aroma ha Downgate Nongpoh.
Ïa kitei ki 2 tylli ki dukan la leit ban plie paidbah da u MLA ka Nongpoh u Bah Mayral Born Syiem u ba la ai ruh ka jingïaroh ïa kitei ki 2 ngut ki samla kiba la long ka nuksa ban ieng hala ki jong ki kjat.
Ha ka jingplie ïa ka dukan bam Eastern Aroma ha Downgate Nongpoh, nalor u Bah Mayralborn Syiem la wan ban ïadon ryngkat ruh da u Pastor Robert Terang, u Pastor K Rapsang, Pastor Garfield Sangma, ki ar ngut ki trai jong ka dukan, u samla Peter Syiem bad u samla Aaron Reginald Ingty nalor ki bahaïing hasem bad ki paralok.
Katba ha ka jingplie pat ïa ka dukan sumar bad ai dawai mrad kaba la dei trai da u Dr Esra Syiem ha Pahamsohthri, nalor u Bah Mayralborn Syiem, la wan ban ïadon ryngkat ruh da u Pastor Jerermy O Khonglam bad kiwei kiwe de ki nongïalam balang nalor ki bahaing hasem.
Haba kren ha kine ki ar tylli ki jingplie paidbah ïa kitei ki dukan, u Bah Mayralborn Syiem u la pynpaw ïa ka jingsngewkmen ban iohi ba ki khun samla ka thaiñ ki la mih shakhmat ym tang ban seng kam na ka bynta ïalade shimet, hynrei ban ai kam ruh sha ki wei pat ki samla, khamtam ha kane ka juk kyrduh kam.
U la ong ruh ba ka long da shisha kaba eh ba ka sorkar ban aikam lut ïa baroh ki samla, hynrei wat hapdeng kita ka jingeh bad ki jingkyrduh kam, u la ai pat ka jingïaroh sha kine ki samla kiba la mih shakhmat ban ïakhun ïa kita ki jingeh ban thawlad pat na ka bynta ban sengkam sengjam ban pynbit pynbiang ïa ka ïing ka sem.
