Shilong, K’lyngkot, 24: Da kaba ïatreilang, ka ECHO India, ka Meghalaya State Capability Enhancement Project (SCEP) lyngba ka Government Innovation Lab bad ka Meghalaya Early Childhood Development Mission (MECDM) ki lah pynlong ïa ka Partner Launch Training ka ba ar sngi kaba dei ka lympung ai jinghikai ban kyntiew ïa ka early childhood education ha Meghalaya da ki rukom hikai ba thymmai ban pyntbit ïa ki sap treikam jong ki nongtrei bapher bapher ha kaba ïadei bad ka jing pynsaphriang ïa ki jingnang jingtip.
Kane ka Partner Launch training, kaba long ka prokram ai jinghikai ba bniah bad pura , ka pyni kumno ba ka ECHO model ka lah ban ïarap ïa ki nongtrei ha kaba ïadei bad ka jing pyntbit ïa ki sap treikam. Ha kane ka jingïalang, lah don lang ki riew shemphang ryngkat bad ki nongïashim bynta ki ba lah ai ki jinghikai ba pura, ki jingshem kiba ïadei bad ki rukom trei kam ba man ka sngi ki ban pynsan shuh shuh ia ki sap treikam, ka jing ïatreilang bad ka jing ïa sam jingmut lang ïa kino kino ki jinghikai ba lah ïoh ha ka liang ka pule puthi. Ki nong ïashim bynta ki kynthup ïa ki nongtrei na ki department Social Welfare bad na Meghalaya State Rural Livelihood Society.
U Shri. Sampath Kumar, Principal Secretary & Development Commissioner, Government of Meghalaya, u lah pynshai ïa ka jingdonkam jong ka rynsan ECHO. U lah batai ruh ïa ka jingdonkam ban kyntiew ïa ka jingheh jingsan ki khyllung bad khynnah (Early Childhood Development) bad ka jingkloi jong U ban ïatreilang ryngkat bad ka ECHO ha ki por ki ban wan. Ka jylla ka lah pyndonkam ïa ka bor technology na ka bynta ban bud dien bad peit thuh ïa ki ba bun ki dak ki shin ki ba ïadei bad ka koit ka khiah bad ka roi ka par jong ka jylla. Ka jing ïa teh kam bad ka ECHO-India kan kham pynkloi ha ka liang ban pynkhlain bad pyntbit shuh shuh ïa ki sap treikam ki ba lah don lypa. Lyngba ka jing pyndonkam jong ka bor technology, ka lah ïarap ïa ka Meghalaya ban pynduna ka jingïap hapdeng ki longkmie, ki khyllung bad khynnah bad kumjuh ruh ban pynduna ïa ka jingkhrew ha ki khynnah (SAM bad MAM) ha ki por ba lah dep kaba pyni shuh shuh balei donkam ban pyntbit ha kane ka liang khnang ban pyn neh ïa ki thong ki ba lah jop. Da kaba kyrshan ban kyntiew ha ka liang ban ïashim bynta, U lah kren bad ai jingmut shaphang ka jingsdang ai ki jinghikai ba man ka taiew ryngkat bad ki jing ïashim bynta ba man u bnai ha ki Anganwadi Centers (AWC).
U lah ong ruh ba “ Ngi donkam ka jing pynkylla ïa ka rukom treikam ha kaba ki Lady Supervisors kin pynkylla ïa ki Anganwadi sentar sha ki Early Childhood Development sentar hapoh kine ki hynriew (6) bnai ban wan. Ïa kane ka jing pynkylla donkam ïa ka jingshim bynta jong ki khynnah, ka ban pynsan ïa ki bor pyrkhat jong ki bad ïa kane yn pynïaid shakhmat da ki Child Development Project Officers na ki Anganwadi sentar.
Haba pynkut ïa kane ka training ai jinghikai kaba ar sngi, U lah ai jingmut ban buh ïa ka thong ban sdang ki rynsan ai jinghikai 55 tylli ka ba ïa ryngkat bad ka jing don ki 55 tylli ki block bad U lah pynshai ruh ba donkam ban lam lynti na ka liang ki nongtrei ha ka block ban pynïaid ïa ka kam.
U. Commissioner and Secretary ka tnat Social Welfare Department ka Sorkar Meghalaya u Pravin Bakshi u la long ruh u Kongsan ha kane ka prokram. U lah kren shaphang ka jing donkam ka bor technology bad internet. U lah pynshai kumno "ka jing don jong ki tiar ba pyndonkam ïa ka bor technology bad internet kan ïarap ban pyn kloi ïa ka jingsaphriang jinghikai bad pyn neh ruh ïa ki ha ka ba bun ngut ki briew khlem ka jingdonkam jong ki ban leit na kawei ka jaka shawei pat haba pyntbit ïa ki sap treikam. Ki rynsan ba lah pyndonkam da ka bor technology bad internet ki ai lad ïa ki nonghikai ban pynkylla bad pyn wandur ïa ki rukom ai jinghikai katkum ka jingdonkam ki nong ïashim bynta ki ba na ki jaka ba pher ba pher bad kan ïarap ban ai jinghika ka ba pura khamtam ha ki samla" U lah ïaroh ruh ïa ki rukom treikam ki kynhun kum ka ECHO-India bad ka jingdonkam ban ïa kren bad shim bynta mar kylliang jong baroh ki nong trei kam ha baroh ki liang.
Ka Dr. Anuradha Rai, Director jong ka Gender Equity India Pilot hapoh ka Projek ECHO ka lah pynshai shaphang ka jing pyntbit sap treikam haba ai jinghikai bad ka ong ruh " Ban pyntbit ïa ka sap hikai hapdeng ki nong treikam ka dei ka ba kongsan tam bad ka ban kyntiew ruh ïa ka jingnang jingstad ba pura ha ki khynnah naduh ka por ba dang rit. Ka Partner Launch Training kan ïarap ïa ki nongtrei ym tang ban hikai hynrei ban pynlong ruh ka rynsan hikai ka ban ktah bad ai mynsiem ïa ki nong ïashim bynta. Ka ong ruh ba ka ECHO ka dei ka bym rem dor bad ka ban ïalam sha ka ban ïarap ban ai ka jingstad na ki nong shemphang sha ki paidbah ha shnong. Ka lah batai ruh ïa ki saw tylli ki païa ki ba kyrshan ïa ka rukom treikam jong ka ECHO A- Amplification lane ka ban pyndonkam ïa ka bor technology ban pynsaphriang ïa ka jinghikai haba kynduh ki jingeh na ka bym biang ka por bad ba jngai ki shnong B- Best Practices lane ka jing ïa sam ba mar kylliang shaphang ki rukom treikam ki ba seisoh ki ba pynduna ïa kino kino ki jingleh shiliang bad ban ailad ïa baroh ban ïoh lang kumjuh C- Cased based learning lane ka jinghikai kaba kynthup ïa ka jingïashem lang jong ki nongïashim bynta ha la shnong D-Web based database lane ka jing pyndonkam jong ka borinternet ban bud dien ïa kiei ki ba lah urlong hadien ki jinghikai.
Haba ai jingkren ha kane ka jingïalang, U Bah Ronald Kynta, COO-MECDM u lah batai khyndiat shaphang ka Meghalaya ECD Mission bad u lah ong ruh ba kane ka mission ka kham pher bad ka dei na bynta ban kyntiew ïa ka jingim ki khyllung bad khynnah naduh ba dang pun ka kmie haduh kin da lah don 8 snem ka rta. U lah batai ruh ba kane ka dei ka jingïatrei bad snohkti lang hapdeng ki department jong ka Social Welfare, ka Health &Family Welfare, ka Education bad ka Community bad Rural Development. U lah pyn sngewthuh ruh kumno lah ban pyndonkam ïa ka rynsan ECHO ym tang ha ka liang ai jinghikai hynrei ban peit bad pynïaid kam hapdeng ki nongtrei bad ha kaba ïadei bad ka jing pynïaid kam jong ka projek Ka ECHO India ka treikam ym tang haba ïadei bad ka pule puthi hynrei ha ki liang ai jinghikai ban pyntbit sap treikam ha ka koit ka khiah ruh.
Kane ka training ba ar sngi ka ba lah ïalam da ka Ms. Aanchal Chauhan, Senior Executive Trainer, ka ïadei bad ka jingpyndonkam jong ka ECHO Model bad lah hikai ïa ki rukom treikam sha ki nongïashim bynta. Ka rukom ai jinghikai lyngba ka rynsan ECHO ka pyndonkam ïa ka jing eksamin kaba bniah ha ka por shuwa ban sdang ai ka jinghikai, ki Live Tele ECHO Sessions bad ka jingdonkam ban pyndonkam ïa ki jingshem lane jingtip ha ka por ba pyntrei ïa ka kam. Ha kawei pat ka session ba lah islam da u Mr. Ismail Ahmed, Senior Executive Trainer ka kynthup ïa ka jingïashim bynta ban pyrshang kumno ban pynïaid ïa ka rynsan hikai Tele-ECHO.
U Mr.Ahmed u lah pynshlur ïa ki nongshim bynta ban ïatrei ban pyrshang ïa kane ka Tele-ECHO da kaba khot ïa ki nongïashim bynta na man la ka kynhun jong ki department bapher bapher. Lyngba ki jingkylli bad jing ai jubab ka lah kham pynshai bad sngewthuh shuh shuh ïa ki nongïashim bynta ha ka liang ban pyndonkam ïa ka ECHO. Shuwa ban pynkut ïa ka lympung ai jinghikai, ka lah don sa kawei ka session ha kaba baroh ki nongïashim bynta ki lah ai jingmut lang ïa ki jingshem jong ki ha ba pynkhreh ïa ka rukom pynïaid ïa ki projek ki ba pher da ka jing pyndonkam jong ka ECHO.
Ïa Kane ka Partner Launch Training yn kynthup ïa ki 12 tylli ki hubs lane rynsan hikai kat kum ka jingdon ki district lane 55 tylli ki rynsan hikai katkum ka jingdon ki block ha ka jylla bad yn sa pyn wandur da ka kynhun ECHO. Lah khmih lynti ba ka PLT kan wanrah ïa ka jingkylla kaba bha ha ka jingnang jingstad ha ka por ba dang rit lyngba ka jing ïatreilang ki nongtrei kam bapher bapher.
Ka ECHO India ka dei ka NGO ka ba thmu ban ïa ka pynroi bad pynbha ïa ka imlang sahlang ha ka shnong ka thaw da kaba kyntiew ïa ki nong trei kam shnong da kaba pyntbit ïa ki sap treikam jong ki. Ka ECHO India innovative hub model ka don ki nongshemphang ba tbit ban ïarap ha ka ban ai jinghikai ïa ki nong ïa shim bynta. Kane ka model ai jinghikai yn pyndonkam da ka bor technology lyngba ka rynsan iECHO ka ban ïarap ban pyntbit ïa ki sap treikam ha ka rukom ban pynduna ïa ka jinglut ksan.
