Shillong, Jylliew, 30: Ka Central Executive Council (CEC) jong ka United Democratic Party (UDP) ha ka sngi Thohdieng ka la ïathir bad ïatai sani bha halor ka Reservation Policy bad ka Roster System shwa ban aiti ïa ki jingai jingmut sha ka Expert Committee ba la thung da ka Sorkar Jylla.
Ha ka jingïakren bad ki lad pathai khubor hadien ba la wai ka jingïalang, u General Secretary ka party u Dr. Jemino Mawthoh u la ong, “kum ka party ngi la shimkhia bha ïa kane ka kam namarba ym tang kiwei kiwei ki kynhun kiba kwah ban khmih bniah biang ïa ka Reservation Policy.”
“Ngi la bsuh ruh ïa kane ka mat ha ka Election Manifesto ha ka elekshon ba ladep bad hadien kata ngi la shong jin kumba 12-13 sien ki jingïalang ban ïathir kumno ban ai jingmut halor ka Reservation Policty bym pat khmih bniah mynta la 51 snem kynthih,” la ong u Dr. Jemino.
“Ngi la ïoh ïa ki jingai jingmut na ki Legal Expert, ki Scholars bad ki Social Scientist kumno ban pynwandur ïa ka Reservation Policy bad ka Roster System khnang ba ki jaidbynriew ha kane ka jylla kin ym shah ktah. Ngi kwah ban pynwandur ha kata ka rukom bad ngi kwah ba ka Sorkar lada ka pynwandur kan ym don ka jingleh shiliang bad kan long kaba pdiang hun da baroh ki jaidbynriew kiba shong basah ha kane ka jylla,” la bynrap u Dr. Jemino.
U la ïathuh ba hadien ba la ïathir sani, “ki don phra tylli ki jingshem kiba yn sa ai jingmut sha ka Expert Committee ba la khlieh da ka Dr. Ampareen Lyngdoh bad shwa ban leh ïa kata, ngi la wanrah shwa hakhmat ka CEC jong ka party. Hynrei ki dang don katto katne ki bynta kiba ka CEC ka la ai jingmut ba kan bha ban pynkylla katto katne.”
“Ka CEC ka la aibor ha ka Core Committee jong ka UDP ban leh ïa kaba donkam na ka bynta ban bsuh ïa ki jingai jingmut jong ka CEC ha kane ka sngi. Kane ka ishu kam dei ka ishu basuk, ngi hap ban ïathir ïatai bha na baroh ki liang. Halor kine ki jingai jingmut yn ssa rah shwa sha ka Core committee ka ban shim por sa tang ar ne lai sngi bad hadien kata ngin sa phah sha ka Sorkar,” la bynrap u Dr. Jemino.
