Shillong, Jylliew, 30: U National President ka National People’s Party (NPP) u Conrad Kongkal Sangma uba long ruh u Myntri Rangbah ka Jylla ha ka sngi Thohdieng u la ong ba ka Uniform Civil Code (UCC) ha ka rukom long ba mynta ka long pyrshah ïa ka nongrim jong ka ri India kaba kdup lut ïa baroh ki jaidbynriew bad ki jaitniam.
Ha ka jingïakren bad ki lad pathai khubor u Sangma u la ong ba ka India ka dei ka ri kaba bun ki jingïapher bad kane ka jingïapher ka dei ka bor jong ka ri.
U la ong ïa mynta kan long kaba eh ban kren bniah khlem pat ïohi ïa ka jingthoh ba la pynwandur katba ym pat pynmih pyrthei.
“Hynrei lada ïakren, ngi dei na ka jaidbynriew ai jait kmie kum ka nuksa bad kata ka dei ka bor kaba la don lypa bad kata ka dei ka lariti ïa kaba ym lah ban pynkylla ïa ngi bad khlempep ka dei kaei kaei kaba kum ka seng saiñpyrthei ngi sngewthuh ba ka thaiñ Shatei Lammihngi baroh kawei ha ka jingshisha ka don ïa ki lariti kaba kyrpang, ka imlang ka sahlang kaba kyrpang bad namarkata ngin jin da la kwah ban ïaiñeh bad ngin ym kwah ban shah ktah,” la ong u Sangma.
“Namarkata, ngi hap ban ïoh shwa ïa ka Aiñ-Rew, lada ka la mih pyrthei, kan long kumno bad kaei kaba la thoh ha kane ka Aiñ-Rew ka kren bad kumba nga la kren, ka UCC kan long pyrshah ïa kita ki jingmut kiba ka NPP ruh ka sngew,” u la bynrap.
Katba na ka liang jong ka Ka United Democratic Party (UDP) ka la pynpaw ba kam pat shym la shim ïa kano kano ka rai la kan kyrshan ne kan pyrshah ïa ka jingthmu jong ka Sorkar India ban pyntreikam ïa ka Uniform Civil Code (UCC) ha ka ri India baroh kawei.
Ha ka jingïakren bad ki lad pathai khubor u President ka UDP u Bah Metbah Lyngdoh u la pynpaw ba ka UDP kam pat kwah ban kynthoh eiei halor ka UCC namarba ym pat lah ban tip ba kane ka Aiñ-Rew ba ka Sorkar India kan wanrah kan long kano ka dur bad kan treikam ha kano ka dur.
“Ngam pat lah ban ong eiei la ngin kyrshan ne ngin pyrshah namarba ngim pat tip kaba kumno ka jingtyrwa ka Sorkar India kan wanrah hynrei dei tad ynda ngi la ïohi ïa ki jingtyrwa ba kumno ka Sorkar kan pyntreikam,” u la ong.
“Kat haduh mynta ngim pat tip kaba kumno kata ka UCC ba ka Sorkar Indai kan pyntreikam bad dei na kata ka daw ngim pat kwah ban kynthoh ne kyrshan,” u la bynrap.
