Shillong, Nailar, 09: Ka All Tamil Nadu Students’ Association (ATSA) lyngba ki nongkitkam kiba kynthup ïa u President Vishnuram P, u Joint Secretary u Rajarajacholan, u Treasurer u Gideon Bala Singham bad u Advisor u Ragu ha ka sngi Balang ki la wan na Tamil Nadu ban ïa kynduh ïa ki nongïalam jong ka Khasi Student’s Union (KSU) ha nongbah Shillong ban ïasyllok halor shibun ki mat kiba ktah ïa ki paid trai shnong ha North East bad ha South India.
Ha u kyrwoh ba la phah da u General Secretary ka KSU u samla Donald V. Thabah, u la ïathuh ba ki nongïalam jong ka ATSA ki la pynsngew ïa ka jingeh jong ki paid Tamil bad kiwei ki paid Dravidian hapoh ri India bad kumjuh ruh ki nongïalam ka KSU ki la pynsngew ïa la ki jingeh bad diengpynkiang ïa ka jaidbynriew Khasi.
Kine ki ar seng ki la ïasyllok ruh halor ka jingshah iuhroit jong ki paidbah ha North East bad ki paidbah ha South India la ka dei ha ki aiñ Sorkar Pdeng ki bapher bapher kum ka jingpynbor pyndonkam ïa ka ktien Hindi bad ka jingshah buhai shnong pathar ha kiwei pat ki jaidbynriew la ka dei ha Meghalaya lane ha Tamil Nadu, la ong u kyrwoh.
“La ïakren bniah ruh kumno ban wad lad wad lynti ban ïada ïa ki trai ri trai muluk ha Tamil Nadu bad Meghalaya, ban kyntiew ha ka liang ka pule ka puthi bad ka ïoh ka kot,” la bynrap u kyrwoh na ka KSU.
Na ka liang kine ki ar seng ki la rai ba nangne sha khmat kin ïa treilang ha kaba ïadei bad ki mat ki jura kiba ktah ïa ka bha ka miat bad ka ïap ka im ki paid trai shnong ha North East bad ha South India.
Ka ATSA ka la kular ruh ban ïarap ïa ki samla pule Khasi kiba don sha Tamil Nadu lada ki shem ïa kano kano ka jingeh.
Ha shwa kane ka ATSA ka la ïa kynduh ruh ïa ki nongïalam jong ka Naga Students’ Federation (NSF) ha Guwahati bad kine ki kynhun ki la shim ki juh ki rai ban ïatreilang nangne shakhmat.
