Ïasyllok ka CoE halor ka jingdonkam ban pynneh pynsah ïa ka sawdong sawkun ha ka jylla

Shillong, Jylliew 02: Ka Committee on Environment (CoE) jong ka Meghalaya Legislative Assembly, ba la pynïaid da u MLA ka Jowai u Bah Wailadmiki Shylla, ka la khot ban pynlong ïa ka jingïalang ha ka sngi baar hapoh Conference Room, Main Assembly Building, Administrative Block, Meghalaya Legislative Assembly, Police Bazaar (Khyndailad), Shillong.
Ha kane ka jingïalang la wan ban ïashim bynta lang da ki dkhot ka Committee kiba kynthup ïa u Bah Mayralborn Syiem, MLA (Nongpoh), u Bah Methodius Dkhar, MLA (Mawshynrut), u Bah Heaving Stone Kharpran, MLA (Mawryngkneng) bad u Co-opted Member u Dr. Wishming Ryngkhlem.
La ïashim bynta lang ruh da ki heh ophisar na ki tnat sorkar bapher bapher, nangta ki bor pynïaid distrik bad na ka Meghalaya Legislative Assembly Secretariat.
Ka jingthmu ba hakhmat eh jong ka jingpynlong ïa kane ka jingïalang ka long bishar ïa ki kam kiba la ïaid bad kumjuh ruh halor ki jinglong jingman jong ka sawdong sawkun bad ka jingkylla ka suiñbneng kiba la sdang ha ki tnat bapher bapher.
Ha ka jingïalang ki la don kumba 4 tylli ki mat ba la ïakren bniah ha ryngkat ka jingpyni da ki presentation ha khmat ka Committee.
Kitei ki mat ki kynthup ïa ka Planning, Investment Promotion & Sustainable Development Department – ka jingïakren halor ki polisi ba ïadei bad ka jingkylla ka suiñbneng ban pyrkhat kam bad kumjuh ruh ki buit kiba dei ban sdang halor kine ki mat.
Ha kaba ïadei pat bad ka tnat Forest and Environment, ka jingïalang ka la pynleit jingmut halor ki jingpyrshang ban khmih ïa ki jingkylla ka suiñbneng, khamtam halor ki kam bei tyngka bad ki jingpynbiang ïa ki tyllong ba ïadei bad kane ka kam.
Na ka bynta ka tnat Soil & Water Conservation, ka la don ka jingpyni halor ka rukom treikam jong ki jaka pynlang um ne watershed management bad ban pynneh pynsah ïa ki rukom leh khnang ban lah ban tyngkai ïa ka um.
La ïakren ruh halor ka Meghalaya State Pollution Control Board ha kaba la pyni ïa baroh ki kam ba ïadei bad ka sawdong sawkun ha kylleng jong ka jylla.
Ka Committee ka la shim bynta ruh ban bishar kham jylliew ïa ki presentation, nangta ban ïoh ki jingtip ba kham bniah halor ki lad jingmyntoi, ka jingktah bad kumjuh ruh ki jingdonkam ki jingbthah jong manla ki tnat ïa ki kam ba kidei ban sdang. Ki jingïasyllok ki banjur ruh halor ka jingdonkam ka jingïatreilang hapdeng tnat, nang ka jingpyrkhat kam kaba slem, bad ki kam ba ïadei bad ka jinglong ka suiñbneng ban pynthikna ïa ka jingneh jong ka sawdong sawkun.
Ha kane ka jingïalang u Chairperson u Wailadmiki Shylla u la kynthoh, “Ïa kane ka jingïalang hapoh ka ïing la khot ban pynsuk ïa ki jingïatreikam beit bad ki tnat ban ïakren halor ka sawdong sawkun bad ki jingïaleh halor ka jingkylla ka suiñbneng ha ka jylla. Haba pyrkhat ïa ka jinglong jingman kaba mynta, ka long kaba kongsan ban sngewthuh kiei ki sienjam kiba la don ha ka jaka bad kiei ki buit treikam kiba neh slem kiba la leh. Lyngba kine ki presentation ki la long kiba ai jingtip shisha bad kiba ïar, ba la pynpaw ïa ki kam ba la sdang da ki tnat bad ki rukom pyrkhat kam hadien habud kiba dei ban long haduh 20 ne 30 snem. Ha ka Committee la tyrwa ruh ïa ki jingai jingmut kiba tei khnang ban lah pynkhlaiñ shuh shuh ïa kine ki jingpyrshang. Ka jingïalang ba mynta ka sngi ka la long ka dak ka sienjam kaba kongsan na ka bynta ban tei ïa ka jinglong kaba ïatreilang bad ban pyndon ïa ki rukom treikam ban pynneh ïa ka sawdong sawkun ha ka jylla Meghalaya.”
Ka Committee on Environment ka la pynskhem biang ïa ka jingangnud ban khmih ha baroh ki liang ïa ki kam kiban neh, ka jingdonkam ka jingïatreilang ban ïada ïa ka sawdong sawkun jong ka jylla hadien habud.