ïasnoh ktilang ka KSU bad ka Shnong ban pom surok sha ka Shnong u Sngap Sing Syiem

Mawkyrwat, Jymmang 01: Ka shnong Mawtngam, South West Khasi Hills District ka dei kawei ka shnong ba la ju bna nam hapoh ka thaiñ bad haki jingthoh kum ka shnong ba ju shong ju sah u Syiem ialeh laitluid pyrshah iaki dohlieh kata u Sngap Sing Syiem . Kane ka shnong ka jngai kumba 20 kms eiei na ka Mawkyrwat kaba dei ka Head Quarter jong ka District hynrei ka dei na kawei ka shnong bym pat lait kali. Ka kyrwoh ba la phah da u President jong ka KSU South West Khasi Hills, u Samla ka Forwardman Nongrem, la ong ba dang ha kane ka snem kane ka shnong ka la ïoh ïaka mang tyngka napoh ka Border Area Department ban shna ia ka surok na Nongeitser haduh Mawtngam hynrei kata ka mang tyngka ka dang lah ban pynpoi tang kumba 1200 metres eiei ( 1.2 km ).
Kumta, hadien ba la lap ba kane ka mang tyngka kan nym lah ban pynpoi surok sha kane ka shnong kumta na ka liang ka shnong Mawtngam , ka KSU South West Khasi Hills District bad ka KSU Mawkyrwat Circle lem bad ki katto katne ngut ki riew rangbah kim banse ban shim ïaki sien jam ban leh hi noh da kaba ïa synñiang ban trei iaka surok kaba sah sa 1400 metres eiei ( 1.4 km).
Kum ka seng ruh ngi la shim ïa kane ka bynta ban ia don bynta lang bad ka shnong lem bad ki katto katne ngut ki rangbah hadien ba la ap lah slem ba kane ka shnong kan ïoh pom surok namar ka dei kawei ka shnong ba la sahnam haka khana pateng kum ka jaka ba u Sngap Sing Syiem uba dei u syiem ka Hima Maharam u la sah bad une u syiem la niew ia u kum uwei naki nongialeh laitluid pyrshah iaki dohlieh.
” Ngi la leh ia kane kum shibynta ban niew burom ia ka nam ka burom une u riewkhraw ka Jaitbynriew bad kum shibynta ban ia don bynta lang ban ia kit ia bah iaka khia ka shon ki paitbah nongshong shnong “, la ong ki nongïalam jong ka Seng.
Watla lyngba ka mang tyngka ka sorkar lem bad kita ki jingsynniang naka shnong, ki riew rangbah bad ka KSU ngi la lah ban pom surok hynrei ngi i ba kam pat biang bad ngi kwah ba ka sorkar kan siang rong bad ban mang tyngka ruh iaka surok sha Nongeitser.
Kane ka long ruh kum ka nuksa ba ka sorkar ka dei ban phai khmat lem sha ki thain nongkyndong bad khamtam eh sha kane ka shnong.
Ha ka jingshisha hapoh South West Khasi Hills District 9aka 30 tarik u Naiwieng la ju ñiew kum ka Sngap Syiem Day bad ka dei ruh ka sngi Shuti ( District Holiday) hynrei haba peit ïa kane ka shnong ka dang duna ha baroh ki liang bad tang ka KSU kaba la leit sha kane ka shnong ban tei ia u mot sahnam jong une u Syiem la katto katne snem mynshwa.