Jowai, Ïaïong 16: Ka Ummulong SC bad ka Evergreen Mukhla Mission kila ïasam mar shi Point haka jingïalehkai jong ka District Cricket League 2025 bala pynïaid daka West Jaiñtia Hills District Cricket Association (WJHDCA) mynta ka sngi 16 tarik ha Mini Stadium, Khliehtyrshi.
Ka jingïalehkai mynta ka sngi hapdeng ka Ummulong SC pyrshah ïaka Evergreen Mukhla Mission. Ïa ka jingkynting toss la jop da ka Ummulong SC kaba la kam trai ban kawang ball shuwa. Ka Evergreen Mukhla Mission haba leit tied kala kamai 71 runs bad liem baroh 10 wickets haka 25 over.
Ka Ummulong SC ha ka pali jong ka ban beh ïa ka thong ka la ïoh lad ban tied tang 2 over na ka daw ba u slap ba jur ula wan pynthut ha ka por ba dang ïalehkai bad uba la neh slem khlem sangeh shuh haduh ba la pynlong ruh ïa ka madan baroh kawei ban dap da ka um smam.
Kumta hadien ba la ap kumba 1 kynta tam, ki Umpires ki la rai ban pyndam noh ïaka Match bad ki Captains jong baroh ar ki Teams ki la mynjur ban ïasam mar shi point.
Ka jingïalehkai lashai ka sngi 17/04/2025 kan long hapdeng ka North East A.U.(ATS) pyrshah ïaka Lion S&YA haka por 9 baje mynstep.
