ïaroh u PM ïa ka Meghalaya ba bun ki prokram ban saiñdur ïa ki nongshong shnong naduh ba dang rit

By Mawphor Editor On Aug 9, 2023

Shillong, Nailar 08 : U Myntri Rangbah ka Jylla Conrad K Sangma ha ka sngi Ba-ar, ula pyntip ba u Myntri Rangbah Duh ka Ri Narendra Modi, ula sngew shoh jingmut bha halor ki prokram jong ka Sorkar Meghalaya ban saiñdur ïa ka lawei ki nongshong shnong ka Jylla naduh ka por ba ki dang don ha kpoh ka Kmie.
Haba ïakren bad ki nongthoh khubor hadien ka jingïalang bad u Myntri Rangbah Duh ha New Delhi, u Conrad ula pyntip ba u Myntri rangbah ula kmen bha ban ïohsngew halor ka prokram jong ka Sorkar ban saiñdur ïa ka lawei ki nongshong shnong naduh ka por ba ki dang don ha kpoh ka Kmie bad ban pynthikna ruh ba ha man ka jingïaid ka rta jong ka jingim ki Khunlung, ka Sorkar kan leh ïa la ka kamram ban pynthikna ba kin ïoh ïa ka jingkyrshan kaba donkam.
“Ka 1000 sngi ba nyngkong ha ka jingim ki Khunlung ka long kaba kongsan bha bad lyngba ki early childhood prokram, ngin ai ïa ki jingkyrshan bad ki jingdonkam baroh jong ki Khunlung” ula ong.
Ula pyntip ruh ba lyngba ki sienjam bapher bapher, ka Sorkar ka la pyrshang ruh ban kyntiew ïa ka rukom im bad ka ïoh ka kot jong ki nongshong shnong ka Jylla.
U Myntri Rangbah ula ïakynduh ïa u Narendra Modi ha ryngkat ki Myntri Sorkar bad u Lamphang ka ïingdorbar Thaw Aiñ ka Jylla Thomas A Sangma, ha kaba la ïakren ruh ïa shibun ki kam bad pan ïa ka jingkyrshan jong u. Ula aiti ruh ïa ka dorkhas sha u Myntri Rangbah Duh ka Ri.
Halor ka jingïakren ïasuk bad ka Hynniewtrep National Liberation Council (HNLC), u Conrad ula pyntip ïa u Myntri Rangbah Duh ba kane ka kynhun ka la pynpaw ïa ka jinglong ba kloi ban ïakren khlem kano kano ka jingbuh kyndon bad ka Sorkar India bad ka Sorkar Meghalaya, ka ban long hapoh ki kyndon jong ka Riti Synshar ka Ri.
Ula pyntip ba namar kane, ka Ministry of Home Affairs (MHA) ka la ai dak ïa ka Sorkar Jylla ban sdang ïa ka jingïakren ïasuk bad ka HNLC bad ka Ministry ruh ka la kut jingmut ban ai ïa baroh ki jingkyrshan bad jingai jingmut ba donkam haduh ban da pyndep ïa ka jingïakren.
U Myntri Rangbah ka Jylla ula pyntip ruh ha u Myntri Rangbah Duh ba ka jingïakren ïasuk ba pura ka la sdang ïaid mynta bad ka Sorkar Jylla ka kyrmen skhem b aka jingïakren ïasuk kan poi sha ka thong jong ka jingjop.