Shillong, Naitung 13: U Myntri ka Sorkar Pdeng uba khmih ïa ka Development of North Eastern Region (DoNER) Jyoitraditya Scindia ula ai ka jingïaroh halor ka jingïohi jngai jong ka Sorkar Meghalaya ban kyntiew ïa ka New Shillong Investment Area.
Haba ïakren bad ki nongthoh khubor hadien ba la wai ka jingïalang shong bishar kam halor ki projek ha ka thaiñ, u Scindia ula ong, “Nga dap da ka jingkyndit bad sngewtynnad ïa ka jingthmu u Myntri Rangbah ka jylla na ka bynta ka New Shillong Investment Area”.
U Scindia ula ong ba u Conrad Sangma ula pyntip ïa u shaphang ka jingthmu ban tei ïa ka Directorate kaba thymmai na ka bynta ka Shillong Investment Area Project bad pyntip ba ula ai ïa ki jingmut ruh ïa u Myntri Rangbah ka Jylla halor katei ka bynta.
“Nga lah ai ïa ki jingai jingmut ha ka jingïakren hapdeng ka jong ngi, ha kaba kumno ngi dei ban peit na ka bynta ka sor kaba thymmai,” ong u Scindia.
U la pyntip ba ula kdew ïa ki bynta kiba kongsan kiba lah ban kyntiew bha ïa ka Meghalaya bad ka jylla ka dei ban pynleit jingmut bha ha ka liang ka kam jngohkai, ka rep ka riang bad ha ka Information Technology.
U Myntri ka sorkar pdeng ula ong ba ka tnat DoNER kan ym trei tang ha kaba ïadei bad ki projek jong ki riewshimet hynrei kan trei ruh ha kaba ïadei bad ka “macro strategy” hapoh Meghalaya.
U la aiksai ba ka Meghalaya ka don bha ïa ka lad namar ka don ruh marjan bad ka ri Bangladesh bad kumta ka dei ban shim ïa ki lad ki lynti na ka bynta ban kyntiew ïa ka ïew ka hat ban khaïi pateng bad ban pynïasoh ruh bad kiwei pat ki ri.
