Shillong, Naiwieng, 05: Uwei u shipai Border Security Force (BSF), uba don ha Meghalaya, u la khladnoh ha ka sngi u Blei. Ïa une u shipai la tip kyrteng kum u Pratap Ranjan Parida, uba dei na ka shnong Malla jong ka Badatara Panchayat kaba hap hapoh ka Gop Block jong ka Puri District.
Ki bor bahalor ka tnat shipai BSF ki la pyntip mar mar sha ki bahaing hasem halor ka jingkhladnoh jong une u shipai. La pyntip ba u Parida u la khladoh hadien ba ula hap ha kawei ka liew muri kaba don harud surok katba dang mih na ktem Sura.
Tang shu ïoh jingtip halor kane ka jingjia, ki marjan marpa ki la leit sngewlem ïa ki bahaing hasem hapoh shnong Malla.
U hymmen jong une u shipai uba la khladnoh uba trei hapoh ka tnat Pulit Central Reserve Police Force (CRPF), katba uwei pat u para uba rit u la ïap ha ka jingtakhuh kali ar snem mynshwa.
Ïa ka met ba dang sah jong u Parida la pynkit na Meghalaya sha Bhubaneswar ha ka janmiet sngi U Blei.
Kum ban shu pyntip hangne, ha u bnai baladep, ka Jylla Odisha ka la duh noh ïa uwei u shipai uba la tip kyrteng kum u Saroj Kumar Das uba la shah rong ha ka jingshet um ha Wah Teesta ha Lachen Valley na ka jingbthei ka Lhonak Lake ha North Sikkim ha u bnai baladep.
