Jowai, Jymmang 19: Uwei u Pulit Home Guard Volunteen ïa uba la tip kyrteng kum u Primel Bamon ula duhei ïa la ka jong ka jingim ha ka sngi Palei hadien ba ka tnat dieng kseh kaba heh kaba la kheiñ ka la hap halor ka tnum kaba la pei lyngba sha ka kamra thiah jong u.
Kane ka la jia ha ka por kumba 3 baje eiei mynstep.
U Bah Primel Bamon, uba la 32 snem ka rta u dei u khun jong ka Kong (L) Phaimon Bamon ba shong ba sah ha Quarter PWD, Ladthalaboh, Jowai. Ha kane ka jingjia, ka kurim bad ki khun ki jong u, ki la lait thaw na kane ka jingjia basngewsih.
Ka khubor ba la ïoh lum, ka ïathuh ba ka ïing sah jong u Bah Primel ka don ha trai jong ki deng kseh bad namar ka jingjur palat u slap bad ka lyer ka tnad dieng ka heh ka la kdiah bad ban ïa ka ïing na jrong ka tnum ïing kaba la sam shapoh ïing ha ka kamra thiah u jong u Bah Primel bad ka la ban syndon ïa u, katba ki khun bad ka lok jong u ki la lait na katei ka jingjia.
Ïa u Primel Bamon la pynkit noh sha Norman Tunnel Hospital bad la pyntikna ba ula khlad. Ki Pulit ruh tang shu ïoh jingtep halor kane marmar ki la leit sha kane ka jaka bad pynkit noh ïa ka met sha Ïalong Civil Hospital na ka bynta ban leh ïa kaba donkam.
La ïathuh ba u Primel Bamon dei uba trei kum u Home Guard Volunteer (HGV) jong ka Jowai Police Station bad ula ïehnoh shadien ïa ka lok bad lai ngut ki khun. Ïa ka met yn pyndep lashai ka sngi ha ka por 1:00 baje nohphai sngi ha u lum jingtep jong ka Balang Presbyterian Ladthalaboh, Jowai.
