Nongpoh, Nohprah 30: Kawei ka longkmie kala ïap noh hashen bad uwei u rangbah u la mynsaw jur hadien ba ka thuk thuk kaba ki shong kala leit ban rung ha khrum trok ha Umling.
Katkum ka jingtip bala ïoh lum kane ka jingjia kala jia mynta ka janmiet haka por kumba 5 duna eiei ha kaba katei ka thuk thuk kaba don ïa u number ML 05 J 8849 kaba dang kiew sha Shillong kala leit ban tynrah ïaka trok kaba don ïa u number AS 01 DD 9728 kaba dang hiar na Shillong haka shnong Umling haduh ba kawei ka longkmie kala khlad noh syndon hashen katba u nongñiah katei ka thuk thuk u la mynsaw jur bad la pynkit noh sha Civil Hospital Nongpoh.
Kat haduh ban da thoh ïa kane ka khubor ym pat tip thikna ïaka kyrteng bad ka jaka sah jong katei ka longkmie bala khlad noh bad utei u ba mynsaw, bad naka liang ki pulit ki dang pynlong ka jingtohkit halor katei ka jingjia.
