Bteng ka Synjuk ki RS Ri Bhoi ban sam jaiñkup syaid shaki longiing ba duk bad ki riew tymmen

Nongpoh, Nohprah 30: Ka Synjuk ki Rangbah Shnong Ri-Bhoi District mynta ka sngi kala bteng ban leh ki kam isynei da ka ba sam da ki jaiñkup syaid sha kumba 90 tylli ki longiing ba duk ba rangli bad ki riew tymmen sha ki 4 tylli ki shnong ha Ri-Bhoi shuwa ka jingpdiang ïa u snem thymmai haka jingïatreilang bad ka kompani NEZONE bala pynlong ha iingdorbar Pahammawleiñ bad 15 mer.
Kitei ki 4 tylli ki shnong ki kynthup ïaka Ñiangbarilum, Pahammawleiñ, Shakhoikuna bad 15 Mer bala wan ban sakhi da ka jingdonlang u Bah BB Makdoh Chairman ka Synjuk ki Rangbah Shnong Ri Bhoi District, Bah Rayonald Kharkamni Secretary Nongpoh Town Committee, ki Rangbah Shnong na kylleng ki shnong ka Ri Bhoi bad kiwei kiwei ki riew rangbah.
Haba kren ha katei ka sngi naka liang u Bah BB Makdoh kum u Chairman ka Synjuk ki RS u la pynpaw ka jingsngewkmen ka ba khraw ba kum ka Synjuk kala ïoh ban bteng ban leh ki kam isynei, bad kum ka Synjuk kala thmu ban pyndep shuwa ka Khristmas hynrei namar ka jingkhim jong ka por kila ialeh katba lah ban pyndep shuwa ban pdiang ia u snem thymmai.
U la ong ruh ba kum ka Synjuk kan dang bteng ban leh ki kam isynei ha ki snem ban wan bad kyrmen skhem watla ka dei ka jingai kaba rit, kitei ki longing kin pdiang da ka jingïeid bad ka jingkmen ba u Blei un dang ai haki ka met kaba koit kaba khiah ba kin pdiang ruh u snem thymmai da ka mynsiem kaba kmen ba u snem thymmai un long u snem u dap kyrhai ha baroh ki liang.