Ïakynduh lang ki nongtrei Muster Roll ha ka ‘9th Annual General Meeting’ ha Shangpung

Jowai, Nailar 17: Ka All Jaiñtia Muster Roll Workers & Labour Union, Central Executive Committee (CEC), Jowai mynta ka sngi saitjaiñ kala pynlong ïa ka jingïakynduh lang ne ka ‘9th Annual General Meeting’ ha Madan Pohlyngdoh, Shangpung Pohchnong, ha kaba u myntri ba dei peit ïa ka tnad Food Civil Supplies & Consumer Affairs ma Comingone Ymbon ula long kum u kongsan.
Kane ka jingïakynduh jong ki nongtrei bylla sngi ki kynthup naduh ki nongtrei Muster Roll ha ki tnad sorkar bapher bapaher, ki nongshet Mid Day Meal, ki Misteri bad baroh ki nongbylla sngi kiba don hapoh ka East bad West Jaiñtia Hills District.
La seng ïa ka AJMW&LU naduh ka 17th August, 2018 hapoh ka jingïalam u ma Khroo. L Pariat, kane ka seng ka ïeng ha ka nongrim ban dawa ïa ka hok jong baroh ki nongtrei bylla sngi ba kim dei ban duh ïa ka hok longbriew manbriew kaba ki dei hok ban ïoh na ka sorkar.
Ka jingdon jong kane ka seng ka long kum ka lad jingïarap ïa ki nongtrei bylla sngi kiba kynduh jingeh khamtam ha ki kam ki jam jong ki naduh ka bai nong sngi kaba dei ban kiew manla u snem bad ka sorkar kam dei ban pynsah slem ïa ka bainong kaba kila dep trei.
Ha kane ka sngi da ki spah ngut ki nongbylla sngi kynthup ïa ki nongshet Mid Day Meal na kylleng ki jaka jong ka East bad West Jaiñtia kiba don hapoh ka lama ka AJMW&LU kila wan sha kane ka jingïalang, kum ka lad ban ïa kynduh lang para nongtrei bylla sngi bad ban ïa phylliew jingmut lang na ka bynta ki jingeh.
Na ka liang u kongsan ma Comingone Ymbon haba ai jingkren ula ïaroh ïa kane ka seng kaba la trei na ka bynta ka jingbha jingmiat jong ki para nongtrei bylla sngi, ula kyntu ruh kum ki nongtrei Muster Roll ki dei ban pyndep hok ïa ka kam ym tang ban hun ban ïoh ïaka pisa.
Ha ka juh ka por ula kyntu jur ban pynneh pynsah ïa ka mei mariang ban wanrah ïa ka jingjyrngam da kaba thung ïa ki tynrai dieng ha ki jaka ba la dep pom ïa ki dieng ki siej. “La kumno kumno lada pom ïa uwei u dieng dei ban thung bujli pat haduh 10 tylli ki dieng”, ong ma Ymbon.
Shuh shuh ula pynsngew ïa ka jingkylla ka suiñ bneng kaba la wah rah ïa ka jingshit haduh katta katta, kumta ka donkam bha ban pynneh pynsah ïa ka mariang, da kaba pynsngew ba ka sorkar ka don ïa kawei ka skim (Environment Protection Scheme) na ka bynta kino kino kiba pynneh pynsah ïa ki khlaw ki btap haka jingheh kaba 1 hectare ka sorkar kan siew 15 hajar tyngka manla u snem.
Ïa ka jingïalang la pynïaid da ka kong Meri Shangpung (Vice President) bad la ïoh ruh ïa ki kyntien ai mynsiem na u Adviser bad u nongseng ka AJMW&LU u ma K.L. Parait, la pynshong shit shuh shuh ïa kane ka sngi da ki jingrwai bad ki jingshad tynrai, ïa ki kyntien ai khublei la ïoh naka General Secretary kong Hunbeitki Dkhar bad hadien kane ka prokram la don sa ka jingïalang pyrkhat kam ha ka sien shong kaba ar.