Nohprah 01: U Myntri Rangbah duh, u Narendra Modi u la ïakren bad kiba ioh jingmyntoi jong ka Viksit Bharat Sankalp Yatra lyngba ka video conferencing mynta ka sngi. U la pyllait ruh ïa ka Pradhan Mantri Mahila Kisan Drone Kendra.
Ha kane ka prokram, u Myntri Rangbah duh u la aiti ïa ka Jan Aushadhi Kendra kaba 10,000 ha AIIMS, Deoghar. Shuh shuh, u Modi u la plie ruh ïa ka prokram ban kyntiew ka jingdon ki Jan Aushadhi Kendra ha ka ri na ka 10,000 sha ka 25,000 tylli. U Myntri Rangbah duh u la pynbna ïa kine ki artylli ki sienjam, ka jingai drone sha ki SHG jong ki longkmie bad ka jingkyntiew ka jingdon ki Jan Aushadhi Kendra na ka 10,000 sha ka 25,000 tylli ha ka jingai jingkren jong u ha ka jingrakhe sngi ioh Jinglaitluid ka ri mynta u snem.
Kane ka prokram kalong ki dak jong ka jingpynurlong ïa kine ki jingkular. U Myntri Rangbah duh u la ïakren bad kiba ioh jingmyntoi na Deoghar ha Jharkhand, Raigarha ha Odisha, Prakasam ha Andhra Pradesh, Namsai ha Arunachal Pradesh, bad Arnïa ha Jammu and Kashmir.
Ha ka jingai jingkren ha ka jingïalang, u Myntri Rangbah duh u la ong ba ka Viksit Bharat Sankalp Yatra ka la dap 15 sngi mynta ka sngi bad mynta ka la sdang ïaid shaphrang.
Da kaba kdew ïa ka jingieid bad ka jingïashim bynta jong ki briew kaba la ïalam sha ka jingkylla ha ka kyrteng ba ju tip ïa ka kali VBSY van na ka ‘Vikas Rath’ sha ka ‘Modi Ki Guarantee vehicle’, u Myntri Rangbah duh u la ai khublei ïa ki nongshong shnong namar ka jingshanïah jong ki ha ka sorkar. U la pynpaw ka jingkmen ban ïakren bad ki nongioh jingmyntoi jong ka VBSY bad u la ïaroh ïa ka mynsiem jong ki, ka jingshitrhem bad ka jingkut jingmut.
U la pyntip ba ka kali ‘‘Modi Ki Guarantee vehicle’ haduh mynta ka la poi sha palat 12,000 tylli ki gram panchayat ha kaba 30 lak ki nongshong shnong ki la ïashim bynta ha kane. U la ïaroh ruh ïa ka jingïashim bynta jong ki longkmie ha ka VBSY.
“Manla u briew ha man ka shnong ki sngewthuh ïa ka jingmut jong ka roi ka par,” la ong u My ntri Rangbah duh da kaba kdew ba ka VBSY ka la kylla sha ka jingïakhih paidbah na ka sienjam jong ka sorkar.
Ha ka jingsakhi ïa ka jingkiew ki kam digital ha ki rynsan socïal medïa da ki nongioh jingmyntoi kiba rim bad kiba thymmai bad kito kiba ïadon bynta bad ka VBSY, u Modi u la kyntu ïa ki ban upload ïa kum kine ki dur bad ki video ha ka Namo App namar u peit ïa kane man la ka sngi.
“Ki samla ki la long ki nongrah ktien jong ka VBSY,” u la ong. U la sakhi ruh ïa ka jingktah jong ka VBSY ha ka jingkhuid jong ki shnong ha kaba la sdang ïa ki campaign ha bun ki jaka ban pdïang ïa ka ‘Modi Ki Guarantee vehicle’. “Ka Indïa mynta ka ïaid shaphrang khlem jingsangeh. Dei ki briew jong ka ri kiba la shim ïa ka rai ban pynlong ïa ka ri kaba la kiew,” u la bynrap. U la kren ruh shaphang ka jingpynshlur ïa ka ‘Vocal for Local’ ha ka aiom lehkmen ba dang shu kut shen.U Myntri Rangbah duh u la ïaroh ïa ka jingshanïah ha ka ri bad ki sienjam jong ka na ka bynta ka jingpdïang kaba jop ïa ka VBSY.
Haba phai sha ki por haba ka sorkar ka leh klet ïa ki jingdonkam jong ki briew ka ri haba bun ki nongshong shnong jong ka ri kim don ïa ki jingdonkam ba hakhmat eh kum ki iing, ki painkhana, ka bording elektrik, ki gas connection, ka insurance lane ki bank account, u Myntri Rangbah duh u la pyni ïa ka jingdon ka jingbamsap kum ka jingshim pisa.
U Myntri Rangbah duh u Modi u la kdew ruh sha ka kam ban pynhun shuwa ïa ki briew lajong bad u la ong ba ka sorkar ka duh jingshanïah na ki briew jong ka ri. U la kdew ba kadei ka sorkar kaba mynta kaba la pynkylla ïa ka rukom synshar kaba sniew sha ka rukom synshar kaba bha bad ka thmu ban pynthikna ba baroh kiba dei ban ioh jingmyntoi na ki skhim ki ioh ïa kane.
“Ka Sorkar kadei ban ithuh ïa ki jingdonkam jong ki briew ka ri bad ban ai ïa ki hok jong ki. Kane kadei ka rukom tynrai, kane kadei ka hok ha ka imlang sahlang,” la ong u Myntri Rangbah duh.
Dei namar kane ka rukom treikam, u Myntri Rangbah duh u la ong ba ka ka la wan ka jingthrang kaba thymmai bad ka jingsngew shah iehbein hapdeng ki klur ngut ki nongshong shnong ka la kut.
“Ka jingkular jong u Modi ka la sdang ha kaba ka jingkhmih lynti na kiwei ka la kut,” la ong u Modi.
“Ka jingkut jingmut ïa ka Indïa kaba la kiew kam dei jong ka sorkar Modi lane kano kano ka sorkar, kadei ka jingkut jingmut ban rah shakhmat ïa baroh ha ka lynti jong ka roi ka par,” la ong u Myntri Rangbah duh.
U la ong ba ka Viksit Bharat Sankalp Yatra ka thmu ban rah shakhmat ïa ki skhim jong ka sorkar bad ki jingmyntoi sha kito kiba la shah iehdien. U la pyntip ruh ba u peitngor bha ïa ki kam pynroi ha ka Namo App bad u la kren shaphang ka jingpynher ïa ki drone, ki health check-up camp bad ki inspection camp na ka bynta ka jingpang sickle cell anaemïa ha ki jaka rilum.
U Myntri Rangbah duh u la kdew ba bun ki panchayat ki la lah ban ai lut ki jingmyntoi sha ki briew kiba dei ban ioh ïa kine lyngba ka jingwan jong ka VBSY bad la ai shuh shuh ki jingtip sha kito kiba la shah iehdien. U la ong ba la pynïasoh mardor ïa ki nongioh jingmyntoi bad ki skhim ba bun kum ka Ujjwala bad ki Ayushman Card bad la ai jingtip ba palat 40,000 ngut kiba ioh jingmyntoi ki la ioh ïa ki connection gas Ujjwala ha ka bynta ba nyngkong.
U la kyntu ïa ki samla ban pynrung kyrteng kum ki My Bharat Volunteer bad ïasoh bad ka campaign My Bharat.Ha ka jingkren shaphang ka jingsdang ïa ka VBSY ba ka don ka nongrim ha ki 4 tylli ki rishot Amrit jong ka ‘Viksit Bharat’, u Myntri Rangbah duh u la pynkynmaw ïa ka Nari Shakti jong ka Indïa, ka Yuva Shakti, ki nongrep bad ki longiing ba duk jong ka ri bad ong ba ka jingkiew shaphrang jong kine ki saw tylli ki rishot kan pynlong ïa ka Indïa ka ri kaba la kiew. U Modi u la ong ba ka sorkar ka trei borbah ban kyntiew ïa ka rukom im bad ban rat dyngkhong ïa ka jingduk na ki longiing ba duk, ban plie ki lad ioh kam bad ki lad seng kam lajong na ka bynta ki samla, ka jingpynkup bor ïa ki longkmie jong ka ri da kaba weng ïa ki jingeh jong ki, bad ban kyntiew ïa ka kamai kajih jong ki nongrep jong ka ri. “Ngan nym shongthait tad haduh ban da lah ban weng shisyndon ïa ki jingeh jong kiba duk, ki longkmie, ki nongrep bad ki samla,” la ong u Myntri Rangbah duh u Modi. U Myntri Rangbah duh u Modi u la kren shaphang ki artylli ki kam ba ïadei bad ka jingpynkup bor ïa ki longkmie lyngba ka jingpyndonkam ïa ki drone ha ki kam rep bad ka jingpynbïang ïa ki dawai ha ki dor ba duna na ka bynta ki longiing ba duk. Haba kren shaphang ka jingpyllait ïa ki PM Mahila Kisan Drone Kendra, u Myntri Rangbah duh u la pynkynmaw ïa ka jingpynbna jong u shaphang ka Drone Didi ha ka jingai jingkren jong u ha ka jingrakhe sngi ioh Jinglaitluid ka ri bad u la pyntip ba ïa ki drone yn ai sha 15,000 tylli ki self help group ryngkat bad ka jingai jinghikai kumno ban pynher ïa ki drone ha ki por ban wan.
U la ban jur halor ka campaign kaba dang ïaid mynta ban pynlong ïa ki longkmie kiba lah ban kyrshan dalade lyngba ki self-help group kan nang khlain lyngba ka Drone Didi bad kan plie lad shuh shuh ïa ki ha ka kamai kajih. “Lyngba kane, u Myntri Rangbah duh u la ong, ki nongrep jong ka ri kin lah ban pyndonkam ïa ka teknoloji katkum ka juk myntakum ki drone ha ka dor kaba duna ka ban ïarap ïa ki ha ka jingtyngkai ïa ka por, ki dawai bad ki sboh. Haba kren shaphang ka jingplie ïa ka Jan Aushadhi Kendra kaba 10,000.
