ïakren u Myntri Rangbah ba ka sorkar pdeng halor ka lawei ki samla pule ba phet na Manipur

Shillong, Nailar 08 : U Myntri ka Tnad Pule Puthi Rakkam A Sangma ha ka sngi Ba-ar ula pyntip ba u Myntri Rangbah ka jylla u Conrad K Sangma ula ïakren bad ka Sorkar Pdeng halor ka lawei jong ki samla pule ka Jylla, kiba la wan phet na ki jaka pule ka Jylla Manipur, kaba don hapdeng ka jingbym shongsuk shongsaiñ na ka thma sngewïapher jaidbynriew.
U Rakkam u pyntip ha ki nongthoh khubor ba ki Kmie ki Kpa jong ki samla pule ki la wan iakynduh ïa u ha Tura bad pynpaw ïa ka jingsngewkhia halor kane ka kam.
“Kane ka dei ka kam kaba khia bha bad u Myntri Rangbah ka Jylla ula ïakren bad ka Sorkar Pdeng namar kane ka dei ka kam ba khlem ka jingai jingbit ka Sorkar Pdeng, kiei kiei kin ym urlong satia. Ban shim ïa ki samla pule na kiwei pat ki University kam dei ka kam kaba suk” ula ong.
Ha kajuh ka por, u Rakkam uba dei ruh u Nongïalam ka NPP, ula pyntip ba ki Nongïalam ka NPP ki la ïakren ruh bad ka Sorkar Pdeng ha kaban wanrah noh ïa ka jingsuk ha Manipur.
Ka kynhun jong ki Nongïalam ka NPP ba kynthup ïa ka MP na Jylla bad Manipur, ki la ïakynduh ïa u Myntri kam Pohïing ka Ri Amit Shah ba un shimkhia ha ka ban tuklar mardor ïa ka jinglong jingman ha Manipur.
“Nga kyrpad ïa ki para shynrang bad kynthei ha Manipur ba ka jingsuk ka dei kaba donkam tam ha ka ïing ka sem” ula ong.