Nongpoh Naiwieng 19: Ka lympung ïalehkai phutbol 4th Edition Ri Bhoi League Super Division ba la pynïaid da ka Ri Bhoi District Sports Association (RBDSA) ka la sdang mynta ka sngi 19 tarik Naiwieng ha madan ïalehkai ka shnong Umdihar bad ïa katei ka lympung la wan ba plie pyrda da u MDC ka Nongpoh u Bah Balajied Ranee, ha ka jingdon ryngkat, u Bah R.R Makdoh Adviser RBDSA, u Bah R.B Shadap President RBDSA lem bad kiwei kiwei ki riew rangbah, ki nongkitkam jong ka RBDSA.
Ha kane ka lympung ïalehkai phutbol jong ka Ri Bhoi League Super Division, ki la don kumba 12 tylli ki kynhun ki ba la wan ban ïa shimbynta.
Haba phai sha ka jingïalehkai plie pyrda mynta ka sngi ka jingïakhun kala long hapdeng ka kynhun jong ka Umran Dairy Sports Club pyrshah ïa ka Kongripara Sports Club, ha kaba ka jingïakhun ka long kaba itynnad bad kaba ïakhaid bha naba baroh ar tylli ki kynhun ki la ïakhun tyngeh bad sei ïa la ka sap ka phong.
Hadien ka jingïakhun kaba la neh kumba katto katne por jong ka kylla step, ka kynhun jong ka Umran Dairy Sports Club ka la ïoh ban pynkhih nyngkong ïa ka jar da kaba tam 1-0 ha ka kylla step. Haba wan ban mih madan biang ha ka kylla miet, ka kynhun jong ka Kongripara Sports Club ka la ïoh pat ban pynphai kylla bad ka jingïakhun ka kut noh ha ka jingïakhaid da 1-1 kol.
Ha ka jingïalehkai kaba ar pat, la ïakhun da ka Umdihar Sports Club pyrshah ïa ka Mawtari Mardon Sports Club bad ka Umdihar Sports Club ka la pynliem noh da 2-0 pyrshah ïa ka Mawtari Mardon Sports Club.
Haba ai jingkren ha kane ka sngi, u Balajied Ranee kum u kongsan, u la ai ka jingïaroh sha nongïalam jong ka RBDSA kiba la lah ban pynlong ïa kane ka lympung ïalehkai phutbol kaba long ka rynsan ïa ki samla ïalehkai phutbol ka thaiñ ba kin ïoh ban sei ïa la ka sap ka phong jong ki.
