Mawkyrwat, K’lyngkot 15: Ki samla pule jong ka Sngap Syiem College, Mawkyrwat, South West Khasi Hills District kiba dei ha kajuh ka por ki National Cardet Crops (NCC) ki la pynlong ïa ka jingïaid-kjat ne kum ka Trekking Adventure ha kaba ki la sdang ïa ka na Mawranglang Viewpoint shaduh sha Shnong Domsiejiong, South West Khasi Hills District.
Lah ban kdew ba ïa kane ka jingïaid-kjat jong ki samla pule ka dei hapoh ka jingïalam u bah Pilastar Nongsiej uba dei u National Mountaineer ne u Nongkiew lum uba la paw hapoh ka South West Khasi Hills District bad uba dei ruh u nongseng ïa ka Kynrewmyllah Adventure Training Centre & Eco-Tourism, Mawranglang.
Ha kane ka jingïaid-kjat, na ka liang ki samla NCC ki la dap da ka jingsngewkmen namar ba ki la ïoh shibun ki jingmyntoi ryngkat ki jinghikai na u bah Pilastar Nongsiej. Ym tang katta, mar sien poi ha ki jaka lum ba jrong la ïohi shai kdar ïa ki jingitynnad ki lum, ki wah ha kaba ym shem poi pyrkhat ba lynti sha Shnong Domsiejiong ka long kaba i tynnad haduh katta katta. Shuh shuh la ong ba ha kane ka jingïaid lynti ka la shimpor kumba 2 kynta tam ei ei.
Haba kren bad u bah Pilastar Nongsiej u la ong ba ka jingthmu jong u ban ïalam ia ki samla pule ki NCC ban leit trekking ha kane ka jaka ka long khnang ba ki khynnah kin dup tip kumno ban kiew ïa ki lum kiba jrong bad ruh ka jingïaid lynti ka long ruh kum kawei ka bynta ban lait na ki jingpang jingshitom khnang ba ka met ka phad kan long kaba koit ba khiah bad kaba khlaiñ bha.
Katba na ka liang u bah Arthemeius Lyngdoh, Senior NCC Sngap Syiem College u la kyntu ïa ki nongshong shnong ba kim dei ban pynjot ïa ki lum ki wah, ki khlaw ki btap bad kumjuh ki dei ban leh khuid namar katne ka jing-itynnad ka mariang, ïaleh ban pynneh pynsah bad hikai ruh ïa ki khynnah ki khun ki kti kumno ban tyngkai ïa ka mei mariang khnang ba ka pateng ban wan kan ïoh ka jingïaroh ban sah ruh ka nam.
Kiba la ïashimbynta ha kane ka Trekking Adventure ki don baroh 19 ngut kynthup ïa ki samla shynrang bad kynthei.
